هەواڵ

-

بەیاننامەى مەڵبەندی رێکخستنى 9ى شارەزوور لەیادی دامەزراندنى یەکێتى و هەڵگیرساندنى شۆرشی نوێ-دا

6/1/2017 6:37:20 AM 456 ‌جار خوێندراوه‌ته‌وه

کەسوکارى سەربەرزی شەهیدان

پێشمەرگە گیانفیداکان، ئەی ئەندامە خۆراگرەکانى سەنگەر، رێکخستنە بوێرەکان، زیندانیانى سیاسی

جەماوەری کۆڵنەدەر

 

دامەزراندنى یەکێتى نیشتمانى کوردستان دواى تێپەڕبوونى کەمتر لەساڵێک بەسەر هەرەسی شۆرشی کۆندا،هیواو  و ئومێدکى ئێجگار گەورەو سەنگیى بە بەرخەلکی کوردستاندا کردەوە و ئەو پەیامەى هەڤاڵ مام جەلال و هاورێکانى گەیاندە خەڵکی، کە دەستەى دژایەتى هەرەسی ئەیلول بۆ چرکەیەکیش سەنگەرەکانى بەرگری گەلەکەمان لەدژى داگیرکەران بەرنادەن و ئامادەنین گوێ بدەنە فیکەى کۆتایی شۆرشی ئەیلول و لەهەناوی شکستى ئەیلودا لەکاتى لوتکەى سەکەوتنەکانى بەعسدا، مەترسیدارترین زەنگی شۆرش لەدژى فاشییەکانى بەغدا لێبدەن  و دروشمی نەسرەوتن تا سەرکەوتن درێژە پێبدەن، تائەوکاتەى بەعس و سەدامییەکان لەبەردەم خەڵکی زوڵملێکراوی باشووردا چۆک دادەدەن.

 

کۆمەڵانی خەڵکی تێکۆشەری کوردستان

یەکێتى نیشتمانى کوردستان لەهەلومەرجێکدا دامەزرا و لەکاتێکدا شۆرشی نوێی هەڵگیرساند، کە گەلەکەمان لەلوتکەى نائومێدیدا رۆژە سەختەکانى دواى هەرەسی بەرێدەکرد، یەکێتى نەک هەر خۆی بۆ شۆرشێکى گەورەتر و فراوانتر ئامادەکرد، بەڵکو ئەو پەیامەشی بە ناوخۆ و دەرەوە گەیاند، کەگەلی کورد ئامادەنییە شۆرش و خەبات و تێکۆشانى سەدەیەکی تەواو بەهۆی رێکەوتنى شومی جەزائیرەوە کۆتایی پێبهێنێت، ئەو سەردەمەى یەکێتى بەچەند مەفرەزەیەکی بچوک و بەچەند پارچە چەکێکی تەقلیدییەوە شۆرشی بەرپاکرد نەک هەر دوژمنانى کورد بەڵکو بەشی هەرەزۆری خەڵکی کوردستانیش ئومێدێکى ئەوتۆیان بەجارێکى تر زیندووبونەوەى شۆرش و خەباتى سیاسی و چەکداری نەمابوو، چونکە خەڵکی ستەمدیدەى کوردستان بەپرسیارێک گومانی خۆیان لەزیندووبونەوەى شۆرش هەبوو، پرسیارەکەش ئەوەبوو کە ئایا:

شۆرشێک کەخاوەنى زیادتر لەسەد هەزار پێشمەرگە بوبێت و دەیان و سەدان ملیۆن دۆلاری لەبەردەست بوبێت و سەرچاوەیەکی گەورەیی مرۆیی لەپشت بوبێت و رووبەرێکى بەرفراوانى باشوری بەدەستەوەبوبێت، نەیتوانیبێت لەبەردەم رێکەوتنیکى شومیی (شای ئێران و سەدام حسێندا) چرکەیەک خۆی رابگرێت، ئەبێت ئەو شۆرشە نوێیەى یەکێتى بەچەند مەفرەزەیەکی پارتیزانەوە چی پێبکرێت و چۆن بتوانێت روبەرووی پیلانى دوو گەورە دەوڵە داگیرکەری کوردستان ببێتەوە؟

ئەگەرچی گومانى خەڵکی کوردستان لەوسەردەمەدا کتومت لەجێگەى خۆیدابوو، بەڵام کەمیش نەبوون ئەو خەڵکە تێکۆشەرانەى کەئومێدی گەورەو هیوای سەرکەوتنیان بەرۆڵی یەکێتى و کەسایەتی کاریزمیی سەرۆک مام جەلال هەبوو، ئومێدی ئەو بەشەى خەڵک و دووربینى سیاسەتەکانى مام و پاڵەوانێتى پێشمەرگەى یەکێتى و تێکۆشانى رێکخستنەکان و خۆراگریی تێکۆشەرانى زیندان، لەماوەى کەمتر لەساڵێکدا ئومێدێکى گەورەى بەبەری خەڵکدا کردەوە، ئەو هیوا و ئومێدانەش دواجار تەواوی نەخشەکەى گۆری و ئەنجامەکەشی بوو بەهۆی راپەرین و راماڵینى بەعسی فاشی لە سێ پارێزگاى گەورەى باشوور.

 

کەسوکاری سەربەرزی شەهیدان

ئەگەرچی یەکێتى و سەرکردەکانى سەرهێڵی دژە هەرەس، هەرلەسەرەتاوە برواى تەواویان هەبوو کەنابێت خەباتى دەیان ساڵی گەلی کورد بەهۆی رێکەوتنى دوو وڵاتى داگیرکەری خاکی کوردستانەوە دامرکێتەوە، ئەگەرچی یەکێتى پێیوابوو دەتوانێت روبەرووی رۆژگاری سەختى ئەو سەردەمە ببێتەوە، ئەگەرچی یەکێتی پیێوابوو کە بەهۆی درێژەدان بەخەبات و کۆڵنەدان، رێکەوتنى شوومی جەزائیر هەڵوەشێنێتەوە، هەڵیشوەشاندەوە، بەڵام لەگەڵ ئەوەشدا ئەوە پێشمەرگەو خوێنى رۆڵەکانى ئێوە بوو توانى مەبەستەکانى یەکێتى و سەرکردەکانى شۆرش گەلی کورد بهێنێتەدی، هەربۆیە بەرلەهەموو کەس ئێوەن شانازییە گەورەکەى بەردەوامبوونى خەباتى رەوای گەلەکەمانتان بەردەکەوێت

 

خەڵکی تێکۆشەری شارەزوور، هەڵەبجە ، هەورامان، پینجوێن

ئەگەر شۆرشی نوێ مایەى شانازی کردن بێت بۆ هەموو کوردێکى ئازادیخواز، ئەوا بۆ ئێوە شانازییەکی گەورەترە، چونکە سەرەراى ئەوەى لەشۆرشی نوێدا ئێوە داینەمۆ و بزوێنەری خەباتە رەواکەبوون، لەگەڵ ئەوشدا ئەو شانازییەتان پێدەبرێت کەیەکەمین مەفرەزەى شۆرشی نوێتان پێکهێنا و لەشارەزوورەوە پەیامی زیندووبونەوەى شۆرش گەیشتە ناوچەکانى تری کوردستان، هەربۆیە یەکێتى و سەرکردەکانى چەند شانازی بەشۆرش و زیندوبونەوەى کوردەوە دەکەن، زیادلەوە شانازی بەخەڵکى تێکۆشەری ئەم ناوچەیەوە دەکەن، کەلەسەختترین رۆژگارەکانى خەباتدا بەئومێدەوە هاوکاری یەکێتى و هۆکاری زیندووبونەوەى کوردبوون، لەم پێناوەشدا یەکێتى پەیامی خزمەتکردنى زیاتری ناوچەکە و گەشەپێدانى ناوچەکەتان پێرادەگەیەنێت.

 

لایەنە سیاسییەکانى کوردستان

ئەمساڵ لەکاتێدا یادی کاریگەرترین شۆرش دەکەینەوە، کەگەلەکەمان لەقۆناغێکى سەخت و دژواردایە و گۆرانکارییەکانى ناوچەکەش هێندە خێراو گاریگەرن، ئەگەر بەیەکێتى و یەکریزی نێوانمان روبەرووی ئەگەرەکانى نەبینەوە، کاریگەریی سلبی بۆ داهاتووی گەلەکەمان بەجێدەهێلین و خەباتى چەندین ساڵەو خوێنى شەهیدان دەگاتە ئاستى بەدەهەدەرچوون، بۆیە پەیامی ئەمساڵی یادە مەزنەکە ئاراستەى هێزولایەنە سیاسییەکان دەکەین و داواى هەرچی زووترە کاراکردنەوەى پەرلەمان و رێکخستنەوەى نێوماڵی تێکدراوی کورد دەکەین، لەمروەشەوە یەکێتى وەک هەمووجارێک لەپێناو مافە بنەرەتییەکانى خەڵک و تێکنەچوونى ئەزموونى بەخوێن بەدیهێنراوی گەلەکەمان ئامادەى دەستبەرداربوونە لەزۆرێک لەو مافە حزبی و سیاسییانەى کەبەهیمەت و خۆراگریی سەرکردە و جەماوەرەکەى بەدەستیهێناوە.

سلاو لەشەهیدانى شۆرشی نوێ و سەرجەم شەهیدانى رێگاى رزگاری گەلەکەمان

 

مەلبەندی رێکخستنى شارەزوور

1/6/2017

 

 

Copyright © 2012. all rights reserved . Developed by Avesta Group and powered by Microsoft Azure