هەواڵ

-

پۆلیس: لەتاسڵوجەو سەیدسادق دوو ژن خۆیان كوشت

11/3/2017 5:03:30 PM 17 ‌جار خوێندراوه‌ته‌وه

 

پۆلیسی قەزاو ناحیەكانی سلێمانی رایگەیاند لەگەڕەكی تاسڵوجەی سلێمانی و قەزای سەیدسادق  دوو ژن لەڕێی چەكی جۆری دەمانچەكەوە خۆیان كوشتوە.

لەوبارەیەوە ئیقبال محەمەد، وتەبێژی پۆلیسی قەزاو ناحیەكانی سلێمانی راگەیاند، ئەمڕۆ 3ی تشرینی دووەمی 2017، لەگەڕەكی تاسڵوجەی شاری سلێمانی ژنێكی تەمەن 23 ساڵان بەناوی (ا.ع.ع) كە ژنی ماڵەیەوە لەماڵەكەی خۆیدا بەچەكی جۆری دەمانچە گوللەیەكی ناوە بەسەری خۆیەوەو دوای گەیاندنیشی بۆ نەخۆشخانەی فریاكەوتنی سلێمانی بەهۆی سەختی برینەكەیەوە گیانی لەدەستداوەو تەرمەكەشی رەوانەی پزیشكی دادوەری كراوە.

وتیشی: ئەو ژنە كەخاوەنی سێ منداڵەو خەڵكی قەزای خورماتووەو بەهۆی روداوەكانی ئەمدوایەوە ئاوارە بوون.

ئەوەشی خستەڕوو كە لەلایەن بنكەی پۆلیسی تاسڵوجەوە پەڕاوی لێكۆڵینەوە بۆ روداوەكە كراوەتەوە.

وتەبێژی پۆلیسی قەزاو ناحیەكانی سلێمانی راشیگەیاند: هەر ئەمڕۆ 3ی تشرینی دووەمی 2017، لەقەزای سەید سادق ژنێك بەناوی (ت.ع.ع) كە لەدایكبوی ساڵی 1988 كە خاوەنی دوو منداڵەو ژنی ماڵەوە بووە، لەماڵەكەی خۆیدا بەچەكی جۆری دەمانچە كۆتایی بەژیانی خۆی هێنا.

وتیشی: روداوەكە خۆكوژی بووەو تەرمەكەی رەوانەی پزیشكی دادوەری كراوەو لەلایەن بنكەی پۆلیسی سەید سادقەوە پەڕاوی لێكۆڵینەوە بۆ روداوەكە كراوەتەوە.

PUKmedia : M9sharazoor

 

 

Copyright © 2012. all rights reserved . Developed by Avesta Group and powered by Microsoft Azure