هەواڵ

-

پارێزگاری نوێی هەڵەبجە دەستبەکار بوو

10/8/2018 6:50:02 PM 30 ‌جار خوێندراوه‌ته‌وه

لەرێوڕەسمێکدا پڕۆسەی ئاڵوگۆڕی پۆستی پارێزگاری ھەڵەبجە بەڕێوەچوو و ئازاد تۆفیق وەک پارێزگاری نوێ دەستبەکار بوو.
ئەمڕۆ رۆژی دووشەممە  ٢٠١٨/١٠/٨ لە رێوڕەسمێکدا پرۆسەی ئاڵوگۆری پۆستی پارێزگاری ھەڵەبجە بەڕێوەچوو، لە کۆنفڕانسێکی رۆژنامەوانیشدا، عەلی عوسمان، پارێزگاری پێشووی ھەڵەبجە بە وەکالەت پیرۆزبایی خۆی ئاڕاستەی ئازاد تۆفیق ، پارێزگاری نوێی ھەڵەبجە کرد و ھیوای سەرکەوتنی بۆ خواست، بەڵێنیشی دا، لە داھاتوودا ئەگەر لە ھەر پۆستێکی ئیداریدا دەستبەکارببێت پشتیوانی پارێزگاری ھەڵەبجە و ستافی ئیدارەی پارێزگاکە دەبێت.
دواتر، ئازاد تۆفیق پارێزگاری ھەڵەبجە، لە کۆنفڕانسێکی رۆژنامەوانیدا دوای بەیادھێنانەوەی ئازار و مەینەتی و خەبات و تێکۆشان و دەوڵەمەندیی فەرھەنگ و کەلتوری ھەڵەبجە، رایگەیاند: نەک تەنیا کوردستان و عێراق قەرزاری ھەڵەبجەن، بەڵکو کۆمەڵگای مرۆڤایەتی قەرزاری ئەم شارەیە و قەرزیش دەبێت بدرێتەوە.
لە درێژەی وتەکانیدا، ئازاد تۆفیق رایگەیاند: ئێمە لە قوربانیانی خۆمان لە کۆمەڵگەی نێودەوڵەتی خۆشنابین، چونکە ئێمە دەتوانین کارێک بکەین عێراق لەسەر دەستی ئێمە دەگۆڕێت.
راشیگەیاند: ئێمە ھەموومان وەک ستافی ئیدارەی پارێزگا قەرزاری ھەڵەبجەین، بۆیە پێش ئەوەی عێراق و بەریتانیا و کۆمەڵگەی نێودەوڵەتی قەرزی ھەڵەبجە بداتەوە، پێویستە ئێمە یەکەم جار خۆمان قەرزی ھەڵەبجە بدەینەوە.
M9sharazoor : Kurdsat News

Copyright © 2012. all rights reserved . Developed by Avesta Group and powered by Microsoft Azure