هەواڵ

-

هەڵەبجە، نەبوونى چێشتخانەو چایخانەى تایبەت گەشتیاران نیگەران دەکات

هەڵەبجە، سامان حمەلاو
7/27/2013 7:33:31 PM 891 ‌جار خوێندراوه‌ته‌وه


سەرەڕاى ئەوەى دەروازەی یەکەمى شارەکانى هەرێمى کوردستانەو زۆربەى گەشتیاران بەم دەروازەیەدا هاتۆچۆ دەکەن، لەگەڵ ئەوەشدا بوونى ژمارەیەکى زۆر لەناوچەى گەشتیاریی قیمەتى ناوچەکەى لەرووى گەشتیارییەوە گەیاندۆتە لوتکە، بەڵام مانگى رەمەزانى هەموو ساڵێک جێگەى نیگەرانی ئەو هەزاران گەشتیارە ئێرانی و بیانیانەیە کە رووى لەناوچەکە دەکەن، ئەویش بەهۆی نەبوونى شوێنى تایبەت بەحەوانەو نانخواردن! ئابوریناسێکیش روونیدەکاتەوە ناکرێت لەشارێکى وەک هەڵەبجەدا کەلەسەروبەندی بەپارێزگابوندایە هێشتا کردنەوەى چێشتخانەو چایخانە و فرۆشگاى تایبەت لەرەمەزاندا بەعەیبە بزانرێت!
رەمەزان بۆ کێ قورسە؟
بارام بەگ، قسەخۆشی ناوچەى هەڵەبجە، بەتەلاقەکانى بەناوبانگە، ناوبراو لەزۆربەى حاڵەتەکاندا تەلاقی تایبەتى هەیەو زۆرجار تەقەلاقەکانى بارام بەگ کراوەتە پێوەر بۆ پێوانەکردنى حاڵەتەکان، بارام بەگ لەبارەى رەمەزانەوە دەڵێت: تەلاقم کەوتبێت رەمەزان بۆ ئەو کەسانە قورسە کە بەرۆژو نابن، تەرزە بارامیی،گەشتیار و دانیشتووى شاری مەریوانى رۆژهەڵات لەم بارەیەوە بۆ m9sharazoor وتى: کاتێک گەشتیارێک روو لەهەرێمى کوردستان دەکات، یاخود بۆ ئەو هاولاتیانەیش کەخەڵکى ناوچەکەن و بەڕۆژو نین، شوێنێک نییە بۆ هاوڵاتیان پشوویەکى تێدابدەن، یاخود پارویەک نان بخۆن، ئەو کەسانەى بەرۆژو دەبن، بەلایانەوە گرنگ نییە چێشتخانە هەبێت یان نا، بەڵام ئەوانەى بەرۆژو نین، بەلایانەوە نائاساییە شوێنێک نەبێت بۆ نانخواردن، هەربۆیە قسەى ئەو کابرایەى جەنابت باستکرد زۆر راستە.

بۆچی چێشتخانەکان دادەخرێن؟
ئەو سنورەى کەلەئێستادا بەسنوری پارێزگاى هەڵەبجە ناسراوە نزیکەى 340هەزار هاوڵاتی تێدا نیشتەجێیە، هەروەک هەزاران کریکار و خاوەنکاری بیانى و ناوخۆیی و دەیان هەزار گەشتیار بەبەردەوامی لەناوچەکەدان، لەم سنورە بەرفراوان و دانیشتوانە چڕەدا، زۆر بەکەمى چێشتخانەیەک، دەبینرێت، لەباشترین حاڵەتدا چێشتخانەیەکى بچوک دەبینرێت، مریەم زاریی دانیشتووى شاری مەشهەدی ئێرانەو لەگەڵ باوک و دایک و خوشکێکیدا بەناو بازاڕی هەڵەبجەدا بۆ پاروییەک نان وێڵبوون، مریەم بۆ m9sharazoor وتى: ئێمەى گەشتیارانى ئێرانى ئەگەرچی بەتایبەت بۆ هەڵەبجە نەهاتوین، بەڵام هەموو گەشتیارێکى ئێرانى بەلایەوە گرنگە لەگەشتەکەیدا بۆ هەرێمى کوردستان چاوى بەهەڵەبجە بکەوێت، چونکە ئەو شارە خۆشەویستە لەدڵی ئێمەدا، بەڵام زۆرم پێ سەیربوو کاتێک لەناو بازاری شارەکەدا تەنیا یەک چێشتخانەى بچوک هەبوو، کە دەرفەتى نییە نانى بەشێکى کەمى گەشتیار یاخود ئەو کەسانە دابین بکات کە بەرۆژ نین، من نازانم هۆکارەکەى چییەو رەنگە فریاى ئەوەش نەکەوم لەوبارەیەوە پرسیار بکەم، وتیشی: من نازانم چێشتخانەکان بۆچی دادەخرێن؟ لەکاتێکدا بۆ رێزگرتن لەمانگى رەمەزان، شاردنەوەى چێشتخانەکان لەبەرچاوى هاوولاتیان و پەردەپۆشکردنیان کافییە، نەک داخستن.

مەترسی ئابوری هەیە
داخستنى بەشی هەرەزۆری چێشتخانە و کافتریاکانى شارەکە، بۆتە هۆی دوورخستنەوەى زۆرینەى گەشتیاران لەناوچەکە، مامۆستایەکى ئابوریش مەترسییەکانى بەردەوامبوونى حاڵەتەکە رووندەکاتەوەو رایشیدەگەیەنێت بەردەوامبوونى ئەم حاڵەتە مەترسییە لەسەر نەمانى سیما شارستانییەکانى شارەکە، ئەرسەلان کەریم بۆ m9sharazoor وتى: لەمانگی رەمەزاندا ئاساییە بازاڕ و شوێنە گشتییەکان وەک رۆژانى پێش رەمەزان نەبن، بەڵام ناشکرێت لەسنوری شارێکى وەک هەڵەبجەدا کەهەنگاو بۆ پارێزگابوون دەنێت، شوێنێکى تێدانەبێت کەسێک پارویەک نانى تێدا بخوات، ئەگەر ئەم حاڵەتە بەنیسبەت هاوڵاتیانەوە جێگەى نیگەرانى بێت، ئەوا لەرووى ئابوری و گەشتیارییەوە جێگەى مەترسییە، چونکە کاتێک گەشتیارێک روو لەهەڵەبجە دەکات وشوێنێک نەبێت پشوویەکی تێدابدات و خۆی تێربکات، ئەوا هەرەشەکى جدی ئابوری بۆ ئێستاو ئایندەى شارەکە دروست دەبێت، وتیشی: جگە لەمەترسییە ئابورییەکە، نەبوونى ئەم جۆرە دوکان و فرۆشگایانە دەبێتە هۆی دابڕینى سیما شارستانییەکان لەشارەکە.

 

 

 

Copyright © 2012. all rights reserved . Developed by Avesta Group and powered by Microsoft Azure