هەواڵ

-

بنكەیەكی داڵدەدان بۆ ژنانی هەڕەشەلێكراوی گەرمیان دەكرێتەوە

سامان حەمەلاو
8/3/2013 1:53:30 PM 626 ‌جار خوێندراوه‌ته‌وه

لە دەڤەری گەرمیان بۆ یەكەمجار شوێنی داڵدەدانی تایبەت بە ژنانی هەڕەشەلێكراو دەكرێتەوە، بەڕێوەبەری بەرەنگاربوونەوەی توندوتیژی دژ بە ژنان لە گەرمیان دەڵێت، ئەو شێڵتەرەی دەكرێتەوە هێشتنەوەی ژنان تێیدا كاتی دەبێت و هیچ ژنێك لە 72 كاژێر پتر لەو شێلتەرە ناهێڵدرێتەوە.

بەپێی ئاماری بەڕێوەبەرایەتی بەرەنگاربوونەوەی توندوتیژی دژ بە ژنان لە گەرمیان، لە ماوەی شەش مانگی سەرەتای ئەمساڵدا 9 ژن لەسەر داوای دادگا رەوانەی بنكەی داڵدەدانی ژنانی سلێمانی كراون، 6 لەوانە كێشەكەیان چارەسەر كراوە و رەوانەی ماڵی خۆیان كراونەتەوە، بەڵام 3 ژنەكەی دیكە هێشتا هەر لە شێڵتەرێكی سلێمانین.

بەپێی ئاماری بەڕێوەبەرایەتی بەدواداچوونی توندوتیژی دژ بە ژنان لە وەزارەتی ناوخۆ، لە ساڵی 2009دا لە هەولێر 163 ژن، لە ساڵی 2008یش 140 ژن چوونەتە شێڵتەرەكان، لە پارێزگای سلێمانی بە گەرمیانیشەوە لە ساڵی 2009دا 149 ژن روویان لە شێڵتەرەكان كردووە، بەڵام لە دهۆك لە ساڵی 2009دا 70 ژن ء لە ساڵی 2008دا 73 ژن براونەتە شێڵتەرەكان.

ئیدارەی گەرمیان لە قەزاكانی كەلار، كفری، چەمچەماڵ ء خانەقین پێكهاتووە و بەسەدان ناحیە و گوندی بەسەرەوەیە، بەڵام هێشتا شێڵتەر لەو دەڤەرە نییە كە ناوچەیەكە تا رادەیەكی زۆر كێشەی ژنانی لێیە و ساڵانە وەزارەتی ناوخۆ وەكو پارێزگایەك ئامارەكانی توندوتیژی دژ بە ژنان لەو دەڤەرە بڵاودەكاتەوە. شێڵتەرەكانی ژنان تەنیا لە هەولێر، سلێمانی، دهۆك ء ئامێدی هەن.

موقەدەم لەمیعە محەممەد، بەڕێوەبەری بەرەنگاربوونەوەی توندوتیژی دژ بە ژنان لە گەرمیان بە (رووداو)ی گوت، چەندین جار داوای كردنەوەی شێڵتەریان كردووە "نوێنەری سەرۆكی حكومەت بەڵێنی پێداین كە لەم ماوەیە شێڵتەر لە كەلار دەكرێتەوە، بەڵام كاتێكی دیاریكراو نییە كە بڵێن ئەو كاتە دەكرێتەوە، بیناكەش ئامادەیە، تەنیا لەسەر دامەزراندنی چەند كەسێك راوەستاوە، كارەكانی لە ئەنجوومەنی وەزیران تەواو بووە".

بەپێی قسەی موقەدەم لەمیعە، ئەو شێڵتەرە بۆ مانەوەی ئەو ژنانەیە كە هەڕەشەیان لەسەرە "بۆ ماوەی 72 كاژێر لەوێ دەبن، لەو ماوەیە یان كێشەكەیان چارەسەر دەبێت، یان رەوانەی شێڵتەری سلێمانی دەكرێن، ئەو ماوەیەش بۆ ئێمە بەسە، چونكە زۆر كێشەی دەڤەری گەرمیان چارەسەر دەكات".

كردنەوەی شێڵتەر لە گەرمیان لە مێژە مشتومڕی لەسەرە، لە ساڵی 2010 لە كەلار لە كۆبوونەوەیەكی بەرفراواندا، بە بەشداری 12 رێكخراو و بەڕێوەبەرایەتی بەدواداچوونی توندوتیژی دژی ژنان ء نوێنەرانی مافی مرۆڤ، تۆڕی رێكخراوەكانی ژنپارێزیان لە گەرمیان پێكهێنا، ئەو تۆڕە چەندینجار داوای كردنەوەی شێڵتەری كردووە.

پێشتر ئەو ژنانەی هەڕەشەیان لەسەر بووە رەوانەی ماڵی مەلا و موختار و ریشسپییانی ناوچەكە دەكران، بەڵام موقەدەم لەمیعە دەڵێت لەوەتەی ئەوان دەستبەكاربوونە، هیچ ژنێكیان رەوانەی ماڵی مەلا و موختار و ریشسپی نەكردووە "ئەگەر درەنگی شەویش بێت رەوانەی خانەی داڵدەدانی سلێمانیمان كردووە، كەس لە ماڵی كەس دانانێین، جار هەبووە لە 8ی ئێوارەوە رەوانەی سلێمانیمان كردووە و بۆ بەیانی هێناومانەتەوە بۆ كەلار".

لەناو قەزای كەلار كە سەنتەری ئیدارەی گەرمیانە، چوار گرتووخانە هەن، دووان بۆ پیاوان ء یەكێكیان بۆ ژنان، ئەوەی دیكەش بۆ نەوجەوانانە، زیندان شوێنی تۆمەتبار و تاوانبارانە نەك بۆ ئەو كەسەی كە هەڕەشەی لەسەرە، بەڵام چەندین ژن هەبوون كە هەڕەشەیان لەسەر بووە و سەرەتا رەوانەی زیندان كراون، پاشان رەوانەی بنكەی داڵدەدانی سلێمانی كراون.

موقەدەم لەمیعە گوتی "ئەمساڵ یەك حاڵەتمان هەبووە رەوانەی زیندانمان كردووە، كە چەند كاژێرێك لەوێ بمێنێتەوە هەتا بۆ بەیانی رەوانەی دادگای بكەین، ئەوەش حاڵەتی تایبەت بووە و لەسەر داوای دادوەر بووە".

وەك موقەدەم لەمیعە دەڵێت، كردنەوەی ئەو شێڵتەرە كۆمەڵێك كێشەیان لە كۆڵ دەكاتەوە "لە كۆڵ مەترسی رێگە و هاتوچۆ و ئیفادی كارمەند و ئۆتۆمبێل و بەنزین دەبینەوە، ئەو شێڵتەرەش كە دەكرێتەوە بە نهێنی دەبێت، رەنگە خەڵكەكەش پێیان باش بێت دۆسیەكان لە گەرمیان بن نەك رەوانەی سلێمانی بكرێن، بەڵام ئەگەر بزانین حاڵەتەكە زۆر مەترسیدارە هەر رەوانەی سلێمانی دەكەین".

جگە لە كردنەوەی ئەو شێڵتەرە، هەر لەم هەفتەیەدا بەڕێوەبەرایەتی بەرەنگاربوونەوەی توندوتیژی دژ بە ژنان لە گەرمیان دەستی كرد بە لێكۆڵینەوە لە كەیسەكانی ژنان و دەستگیركردنی تۆمەتباران. دوای ئەوەی لە وەزارەتی ناوخۆ بڕیاردرا بەشی لێكۆڵینەوە بۆ بەڕێوەبەرایەتییەكانی بەرەنگاربوونەوەی توندوتیژی دژی ژنان بكرێتەوە و دەسەڵاتی لێكۆڵینەوەیان پێبدرێت، لە گەرمیان یەكەم لێكۆڵینەوە لە كەیسی توندوتیژی دەستیپێكرد.

موقەدەم لەمیعە دەڵێت، ژمارەیەك ئەفسەر و كارمەندی تایبەت بە لێكۆڵینەوە دابینكراون و بەشی لێكۆڵینەوەیان كردووەتەوە "پێشتر تەنیا بەدواداچوونیان بۆ كەیسەكان دەكرد، بەڵام لەمەودوا خۆمان لێكۆڵینەوە و دەستگیركردنی تۆمەتباران ئەنجام دەدەین، لە هەفتەی رابردووەوە بڕیارەكەمان بە پراكتیكی جێبەجێكردووە، لەلایەن نووسینگەی كەلاری بەڕێوەبەرایەتیەكەمانەوە یەكەم كەیسی تایبەت بە توندوتیژی خێزانمان وەرگرتووە و چەند كەسێكیشمان دەستگیركرد كە توندوتیژییان بەرامبەر بە ژن كردبوو. ئێستا بنكەكانی پۆلیس تەنیا هاوكارمان دەبن لە هێشتنەوەی تۆمەتبارەكان لە زیندانەكانیان".

ئامارەكانی تووندوتیژی دژ بە ژنان لە گەرمیان

لە ساڵی 2010
9 حاڵەتی كوشتن و خۆكوشتن
37 حاڵەتی خۆسووتاندن و سووتان
2 ژن دەستدرێژی كراوەتە سەر
282 ژنیش سكاڵایان تۆماركردووە

لە ساڵی 2011

6 ژن كوژراون
6 ژن خۆیان كوشتووە
23 ژن سووتاون
7 ژن خۆیان سووتاندووە
102 ژن ئەشكەنجە دراون
174 سكاڵا تۆمار كراون
1 ژن دەستدرێژی سێكسی كراوەتە سەر

لە ساڵی 2012

5 ژن كوژراون
5 ژن خۆیان كوشتووە
5 ژن خۆیان سووتاندووە
28 ژن سووتاون
126 ژن ئەشكەنجە دراون
9 ژن دەستدرێژییان كراوەتە سەر
254 ژن سكاڵایان تۆماركردووە

6 مانگی سەرەتای ساڵی 2013

2 ژن كوژراون
4 ژن خۆیان كوشتووە
6 ژن سووتاون
5 ژن خۆیان سووتاندووە
206 سكاڵا تۆمار كراون
3 حاڵەتی توندوتیژی سێكسی هەبووە

 

Copyright © 2012. all rights reserved . Developed by Avesta Group and powered by Microsoft Azure