هەواڵ

-

نەبوونى ئاگرکوژێنەوەو سەختیی ناوچەکەیان، گرفت بۆ هەورامییەکان دروست دەکات

راپۆرتى/ هاوکار محەمەدو شاهۆ حمەعەلی
8/15/2013 1:29:15 PM 703 ‌جار خوێندراوه‌ته‌وه



ناوچەى هەورامان کە لەدوو شارۆچکەو دەیان گوند و رووبەرێکى بەرفراوان لەزەوی و ناوچەى شاخاوی پێکاتووە، تائێستا ئۆتۆمبێلێکى ئاگرکوژێنەوەى تێدانییە، ئەمەش لەکاتێکدایە کەبەپێی رێنماییەکانى بەرگری شارستانى، پێویستە هەموو ماڵێک، یان دووکان و سۆپەرمارکێکێت و ئۆتۆمبیلێک ئامێرێکى ئاگرکوژێنەوەى تێدابێت، بەڵام حکومەت تائێستا نەیتوانیوە، ئۆتۆمبێلێکى ئاگرکوژینەوە بۆ ناوچەى هەورامان دابین بکات کەنزیکەى 25هەزار کەس لەناوچەکەا نیشتەجێن!

بە دوو شارۆچکەوە ئۆتۆمبێلێکیان نییە!
لەدواى راپەرینى 1991وە تائێستا بەرپرسانى حکومیی لەناوچەى هەورامان داواى ئۆتۆمبێلی ئاگرکوژێنەوە دەکەن، بەڵام تائێستا لەلایەن حکومەتەوە بۆیان دابین نەکراوە، نوخشە ناسیح بەرێوەبەری شارۆچکەى بیارە وتى: ئۆتۆمبێلی ئاگرکوژێنەوە پێویستییەکى سەرەکییە بۆ ناوچەکەمان، بەو پێیەى کەناوچەکە شاخاوییەو ساڵانەش چەندین حاڵەتى ئاگرکەوتنەوە روودەدەن، هەربۆیە چەندینجار بەنوسراوى رەسمى داوامان لەحکومەت کردووە لانى کەم ئۆتۆبێلێمان بۆ دابین بکەن، بەڵام هەرجارەى بەهۆکارێک داواکەمان پشتگوێ خراوە، وتیشی: ساڵانى رابردوو بەهۆی خراپی رێگاوبانەکانەوە، رەنگە ئەگەر ئۆتۆمبێلیش هەبوایە، سودێ:ى ئەوتۆی نەبوایە، بەڵام لەئێستادا سەرجەم رێگاو بانەکانى هەورامان بەگوندەکانیشەوە رێگاوبانى گونجاویان بۆ دروستکراوەو هەموو جۆرەکانى ئۆتۆبێل بەئاسانى هاتوچۆی تێدادەکەن، هەربۆیە یەکێک لەپێداویستییە گرنگەکانى ئەمرۆی ناوچەکە، ئۆتۆمبێلی ئاگر کوژێنەوەیە، بەتایبەتیش لەئێستادا کە حاڵەتەکانى ئاگرکەوتنەوە لەپەرەسەندندان.

بۆیادگاریی، وینەى ئاگرەکە دەگرن !
سروشتى هەورامان ناوچەیەکى شاخاوی و سەختە، کەلەکاتى روودانى هەر حاڵەتێکى ئاگرکەوتنەوەدا بەئاسانى کۆنترۆڵ ناکرێت، هەربۆیە ئەوەى بەلای خەڵکى ناوچەکەوە مایەى نیگەرانییە، ئەوەیە کە پێویستە لەم جۆرە ناوچانەدا حکومەت زیاد لەپێویست هۆیەکانى ئاگرکوێنەوە دابین بکات، نەک وەک ئێستا کە وەک ناوچەیەکى ئاسایی حسابی بۆ نەکراوە، بەکر فەرەج محەمەد دانیشتووى ناوچەکە بۆ M9sharaz00r وتى: من زۆرم بەلاوە سەیرە کاتێک حکومەت لەچوارچێوەى جێبەجێکردنى رێنماییەکانى بەرگریی شارستانی و هاتوچۆدا، سزایەکى ماددی بەسەر هەر شۆفێرێکدا دەسەپێنێت کە ئامێری ئاگرکوژێنەوەى پێ نەبێت، بەڵام هەر ئەم حکومەتە خۆی نەیوتوانیوە ئامێرێکى ئاگرکوژێنەوە بۆ ناوچەیەکى بەرفراوانى ئەم وڵاتە دابین بکات کە هەورامانە.
وتیشی: کاتێک لەناوچەى هەورامان ماڵێک گڕی تێبەردەبێت، بۆ کوژاندنەوەى ئاگرەکە، یان پشت بەهاوڵاتیان دەبەسترێت کەئەمەش چارەسەرێکى گران و ناچارییەو زۆرجار هاووڵاتیان فریاى کوژانەوەى ناکەون، یان هەموان چاوەڕوان دەکەین هەتا ماڵەکە دەبێتە خۆڵەمێش! خۆ ئەگەر ئاگر لەناوچە شاخاوییەکان بکەوێتەوە ئەوکاتە سەرەرای نەبوونى حکومەت لەناوچەکە، لەبەرئەوەى کۆنترۆڵکردنەکەیشی لەتواناى خەڵکدا نییە، ئەوا خەڵک بەناچاری بە مۆبایلەکانیان وێنەى ئاگرەکە، یان وێنەى خۆیان لەپاڵ ئاگرەکەدا بۆ یادگاریی دەگرن، تائەوکاتە قەدەر خۆی ئاگرەکە دەکوژێنێتەوە !

ناوچەکە سەختە، پێویستە فرۆکە بەکاربهێنرێت !
لەبەرئەووى هەورامان ناوچەیەکى سنوریی و جیاکەرەوەى هەردوو وڵاتى عێراق- ئیرانە، ساڵانە رووداوەکانى ئاگرکەوتنەوە ئەگەری زیاتری هەیە بەبەراورد لەگەڵ ناوچە ناسنورییەکان، هەربۆیە لەزۆربەى زۆری دەوڵەتان بۆ کۆنترۆڵکردنى ئاگر لەم ناوچانەدا، پشت بەفرۆکە دەبەسترێت، بەڵام بەوتەى هاوڵاتییەکى ناوچەى هەورامان ئەگەر خەڵکى ناوچەکە داواى فرۆکە بکەن، ئەوا بە 100ساڵی تریش داواکەیان وەک خۆی بەبێ جێبەجێکردن دەمێنێتەوە، لوقمان محەمەد شارەزا لەبوارى بەرگرى شارستانى بۆ M9sharazoor وتى: بەبڕواى من لەبەرئەوەى ناوچەى هەورامان شاخاوییە، ئەوا کۆنترۆڵکردنى ئاگر بەرێگاى ئۆتۆمبێلى ئاگرکوێنەوە، قورس و دژوارە، هەربۆیە پێویست بوو حکومەت وەک چۆن فرۆکەى کشتوکاڵی هێناوە، ئاوەهاش هەندێک فرۆکە، یان هەر هیچ نەبێت دەتوانرێت سود لەفرۆکە کشتوکاڵیەکان وەربگیرێت بۆ ئەوەى لەکاتى کەوتنەوەى ئاگردا فرۆکەکان بەئاسانى و خێراتر بگەنە ئاسمانی رووداوەکە و کۆنترۆڵی بکەن، وتیشی: دەزانم پێشنیازەکەم جێگە ناگرێت، چونکە حکومەتێک بە 20ساڵ ئۆتۆمبێلێکى بۆ ناوچەکە دابین نەکردبێت، داواکردنى فرۆکە چ مانایەکى هەیە!

داواى هاوکاری لەشارەکانى تر دەکەن
لەکاتى کەوتنەوەى ئاگردا لەناوچەى هەورامان، بەهۆی نەبوونى ئۆتۆمبێلەوە ناچارن داواى کۆمەک و هاوکاریی لەشارەکانى تر بکەن، ئەمەش لەکاتێکدایە، بارودۆخی بەرگرى شارستانى لەشارۆچکەکانى دەوروبەریش لەو ئاستەدا نییە بتوانن وەک پێویست هاوکاریی ناوچەى هەورامان بکەن، بەرێوەبەری شارۆچکەى خورمال وتى: ئێمە هەوڵی زۆرمانداوە بۆ ئەوەى لایەنەکانى سەرووی خۆمان گرفتەکەمان بۆ چارەسەر بکەن، بەڵام بەهۆی ئەوەى تائێستا بۆمان نەکراوە، لەبەرئەوە لەکاتى کەوتنەوەى ئاگردا ئێمە داواى هاوکاریمان لەناوچەکانى دەوروبەرمان کردووەو ئەوانیش بەپێی توانا هاوکاریان کردووین.

 

Copyright © 2012. all rights reserved . Developed by Avesta Group and powered by Microsoft Azure