هەواڵ

-

پەرلەمانى کوردستان پشتگیرى لە دۆزینەوەى منداڵە ونبوەکانى هەڵەبجە دەکات

راپۆرتى: جەمال سەرگەتى
8/24/2013 5:46:39 AM 1560 ‌جار خوێندراوه‌ته‌وه


هەڵەبجە،جەمال سەرگەتى
جێگرى سەرۆکى کۆمەڵەى قوربانیانى هەڵەبجە رایدەگەیەنێت تا ئێستا 40 خێزانى هەڵەبجە بە کۆمەڵەى قوربانیانى هەڵەبجەیان راگەیاندووە کە منداڵەکانیان وون بووە ،رایشیگەیاند کۆمەڵەى قوربانیان کاریان کردووە بۆ دۆزینەوەى منداڵە وونبوەکانى هەڵەبجە، لاى خۆشیانەوە کەسوکارى منداڵە ونبوەکانى هەڵەبجە نیگەرانن لە دۆزینەوەى منداڵەکانیان و ئاماژە بۆ ئەوەش دەکەن وەک پێویست هەوڵ نەدراوە بۆ دۆزینەوەى منداڵەکانیان، ئەندامێکى پەرلەمانى کوردستانیش ئاماژە بۆ ئەوە دەکات چەند جارێک بە نوسراو داوامان کردوە لە رێى وەزارەتى شەهیدانەوە کار بۆ دۆزینەوەى منداڵە وونبوەکانى هەڵەبجە بکرێت .
ئاراس عابید جێگرى سەرۆکى کۆمەڵەى قوربانیانى هەڵەبجە لە لێدوانێکدا بە M9sharazoorى راگەیاند، یەکێک لەو کێشانەى کە لەدواى کارەساتى کیمیابارانى هەڵەبجە دروست بووە بوونى منداڵە وون بووەکانى هەڵەبجەیە ،وتیشى ئێمە لە دواى ساڵى 1991 یەکێک لەو کێشانەى کە هەوڵمانداوە چارەسەرى بۆ بکەین گرفتى منداڵەوون بوەکانى شارى هەڵەبجەیە و تا ئێستایش لە هەوڵداین بۆ دۆزینەوەى منداڵە وونبوەکان، ئاماژەى بۆ ئەوەشکرد تا ئێستا 40 خێزان بە کۆمەڵەى قوربانیانى هەڵەبجەیان راگەیاندووە کە منداڵیان وونبووە .
جێگرى سەرۆکى کۆمەڵەى قوربانیانى هەڵەبجە ئاماژەى بۆ ئەوەشکرد ئێمە هەوڵمانداوە لە رێگەى کۆمارى ئیسلامى ئێرانەوە هەوڵى دۆزینەوەى ئەو منداڵانە بدەین و چارەنووسیان دیارى بکەین، داواکاریشە پەیوەندییەکانى کۆمارى ئیسلامى ئێران و حکومەتى هەرێمى کوردستان ببێتە هۆى ئەوەى بتوانرێت چارەنووسى ئەو مندڵانە دیارى بکرێت.

منداڵەکانیان دەوێت
فەخەرەدین سەلیم خاوەنى دوو مندڵى وونبوو بەM9sharazoorى راگەیاند: من خاوەنى دوو مندڵى وونبووم کە لە کارەساتى کیمیابارانى شارى هەڵەبجە منداڵەکانم وونبوون و تاکو ئێستاش نەدۆزراونەتەوە و چاوەرێش دەکەم کە بگەرێنەوە ،وتیشى پاش هەوڵدانێکى زۆر و بۆ دۆزینەوەى منداڵەکان لە کۆمارى ئیسلامى ئێران سەردانى بەرپرسانى ئەو ئەو ووڵاتەمان کردو ئەوانیش بەڵێنیان بێداین کە هاوکاریمان بکەن لە دۆزینەوەى منداڵەکانمان، بەڵام تائێستا نەتوانراوە منداڵەکانمان بۆ بدۆزرێتەوە ،فەخرەدین سەلیم ئاماژەى بۆ ئەوەیشکرد هەر بۆ دۆزینەوەى منداڵەوونبوەکانى هەڵەبجە چەندین جار داوامان لە پەرلەمانى کوردستان و عێراق کردووە کە هەوڵ بدەن بۆ دۆزینەوەى ئەو منداڵانەى کە لە کارەساتى هەڵەبجەدا وونبوون بەڵام تائێستاش هەوڵ نەدراوە بۆ دۆزینەوەى ئەو مندڵانە
لاى خۆشیەوە ئەندامێکى پەرلەمانى کوردستان پشتگیرى لە دۆزینەوەى منداڵە وونبوەکانى هەڵەبجە دەکات .

پەرلەمان ئاگادارە
محەمەد شارەزوورى سەرۆکى لیژنەى پێشمەرگە و شەهیدان لە پەرلەمانى کوردستان بە M9sharazoor ى راگەیاند، ئێمە وەک پەرلەمانى کوردستان پشتگیرى لە هێنانەوەى رووفاتى شەهیدانى هەڵەبجە و منداڵە وونبوەکانى هەڵەبجە دەکەین، وتیشى پشتگیرى خۆمان بە نوسراو ئاراستەى سەرۆکایەتى ئەنجومەنى وەزیران کردووە کە هەوڵ بدەن بۆ دۆزینەوەى منداڵە وونبوەکانى هەڵەبجە و چەندین جاریش نوسراومان ئاراستەى وەزارەتى شەهیدان کردوە هەروەها بەدواداچوونمان کردووە بۆ دۆزینەوەى منداڵە وونبوەکان، ئاماژەى بۆ ئەوەشکرد ئێمە وەک پەرلەمانى کوردستان بەدواداچوون دەکەین بۆ ئەو کێشەیە و هەوڵ دەدەین لایەن وەزارەتى شەهیدانەوە هەوڵ بدرێت بۆ دۆزینەوەى منداڵە وونبوەکانى هەڵەبجە..
بەرێوەبەرى مۆنۆمێنتى هەڵەبجەش رایدەگەیەنێت لە ئێستادا سەرقاڵى بڵاوکردنەوەى ئەلبومێکن بە زمانى ئینگلیزى و فارسى بۆ ئەوەى ووڵاتانى تر بزانن لە کارەساتى هەڵەبجە منداڵ وون بووە.
سەرخێڵ غەفار بەرێوەبەرى مۆنۆمێنتى هەڵەبجە لە لێدوانێکدا بۆM9sharazoor، رایگەیاند، لە پاش ئەوەى ئەلبوومێک بەزمانى کوردى بۆ منداڵە وونبوەکانى هەڵەبجە بڵاوکرایەوە لە ئێستادا مۆنۆمێنتى هەڵەبجە سەرقاڵى بڵاوکردنەوەى ئەلبومێکى منداڵەوونبوەکانى هەڵەبجەیە بە هەردوو زمانى ئینگلیزى و فارسى بۆ ئەوەى ووڵاتانى ترى جیهان ئاگادارى ئەوەبن کە لە کارەساتى هەڵەبجەدا منداڵى شارەکە وون بوون و تا ئێستا نەدۆزراونەتەوە، وتیشى لەو ئەلبوومەدا زانیارى تەواو لەسەر منداڵە ونبوەکانى هەڵەبجە بڵاودەکرێتەوە.

 

Copyright © 2012. all rights reserved . Developed by Avesta Group and powered by Microsoft Azure