هەواڵ

-

سەڵاحەدین دەمیرتاش: هه‌وڵه‌كانی مام جه‌لال له‌ پڕۆسه‌ى ئاشتی له‌توركیادا فه‌راموشناكرێت

کوردستانى نوێ
1/19/2014 5:37:04 AM 562 ‌جار خوێندراوه‌ته‌وه

سه‌ڵاحه‌دین ده‌میرتاش هاوسه‌رۆكی پارتی ئاشتی و دیموكراتی(به‌ده‌په‌)، له‌دیدارێكدا له‌گه‌ڵ كوردستانی نوێ رایگه‌یاند: پێویسته‌ كورده‌كان یه‌كڕیزیی ناوخۆییان به‌هێزتر بكه‌ن، بۆ ئه‌وه‌ی هه‌موو بزووتنه‌وه‌كانی كوردستان له‌ژێر سێبه‌ری كۆنگره‌یه‌كی نه‌ته‌وه‌ییدا كۆببنه‌وه‌، ده‌بێ هه‌نگاوه‌كانیان خێراتر بنێن، وتیشی: یه‌كێتیی نیشتمانیی كوردستان رۆڵێكی گه‌وره‌ی بینیووه‌ له‌پڕۆسه‌ی ئاشتیدا له‌توركیا.

دیداری: سیدار باسوت
له‌ئۆپه‌راسیۆنه‌كانی گه‌نده‌ڵیدا كه‌ دژبه‌ حكومه‌ت ده‌ستی پێكردووه‌، تائێستا به‌ده‌په‌ هیچ هه‌ڵوێستێكی لایه‌نگرانه‌ی نه‌بووه‌، به‌گشتی بێلایه‌نی هه‌ڵبژاردووه‌، به‌ڵام عه‌بدوڵڵا ئۆجه‌لان له‌دوا په‌یامی خۆیدا ده‌ڵێ: ئه‌م ئۆپه‌راسیۆنانه‌ كوده‌تایه‌ له‌دژی حكومه‌ت و كورده‌كان نابێ به‌نزین به‌و ئاگره‌دا بكه‌ن. ئاخۆ ده‌توانین ئه‌نجامێكی وای لێ ده‌ربخه‌ین كه‌ له‌مه‌ودوا به‌ده‌په‌ لایه‌نگری له‌ ئاكه‌په‌ ده‌كات؟
-له‌ڕاستیدا په‌یامه‌كه‌ی ئۆجه‌لان پێچه‌وانه‌ی ئه‌و سیاسه‌ته‌ نییه‌ كه‌ تائێستا به‌ده‌په‌ په‌یڕه‌وی كردووه‌. ئێمه‌ش هه‌میشه‌ ئاماژه‌مان به‌ڕاستی و مه‌ترسیی ده‌وڵه‌تێكی هاوته‌ریب كردووه‌ و زانیومانه‌ كه‌ئامانج له‌و ئۆپه‌راسیۆنانه‌ ته‌نها ئاشكراكردنی گه‌نده‌ڵی نه‌بووه‌، هه‌ر له‌سه‌ره‌تاوه‌ باسی ئه‌و راستییانه‌مان كردووه‌ و راشمانگه‌یاندووه‌ كه‌ نه‌لایه‌نگری له‌و گه‌نده‌ڵییانه‌ ده‌كه‌ین و نه‌لایه‌نگری ئاكه‌په‌ش ده‌كه‌ین، به‌ڵام هه‌رگیز پشتگیری له‌و پیلانگێڕی و هه‌ڵمه‌ته‌ كوده‌تائاسایه‌ی جه‌ماعه‌تیش ناكه‌ین. ئۆجه‌لان-یش ده‌ڵێ ئه‌مه‌ هه‌ڵمه‌تێكی كوده‌تایه‌ له‌دژی حكومه‌ت و به‌ به‌نزینه‌وه‌ له‌و ئاگره‌ نزیك نابینه‌وه‌، چونكه‌ هه‌ندێك لایه‌ن به‌تایبه‌ت مه‌یلی ئه‌وه‌یان هه‌یه‌ كه‌ئه‌م قۆناغی دیالۆگ و دانووستانه‌ تێك بده‌ن و جارێكی تر شه‌ڕی په‌كه‌كه‌ و ده‌وڵه‌ت له‌توركیادا هه‌ڵبگیرسێننه‌وه‌. قۆناغی ئاشتی و دانووستان خۆی له‌خۆیدا به‌زه‌حمه‌ت به‌ڕێوه‌ده‌چێت ئه‌گه‌ر ئیراده‌یه‌كی خاوه‌ن بڕیار نه‌بێت، له‌حاڵه‌تی وادا پڕۆسه‌كه‌ تووشی شكست ده‌بێت.


له‌رابردوودا، به‌تایبه‌ت ساڵی 1993 له‌سه‌رده‌می تورگوت ئۆزال، چه‌ندین جار تاقیكرایه‌وه‌و تووشی شكست بوو، هه‌موو جارێك دامه‌زراوه‌ نهێنی و هاوته‌ریبه‌كان ده‌ستیان خستۆته‌ ناو مه‌سه‌له‌كه‌وه‌، هه‌وڵی تێكده‌رانه‌ ده‌درا و به‌داخه‌وه‌ له‌پرسی كورددا هه‌رگیز هه‌وڵی ئاشتی و دیالۆگ سه‌رنه‌كه‌وت. ئه‌م جاره‌یان ئۆجه‌لان ده‌یه‌وێت بڕیاری یه‌كلاكه‌ره‌وه‌ بدات، واته‌ هه‌ست به‌وه‌ ده‌كات كه‌ تاكه‌ ئامانجی ئه‌م ده‌وڵه‌ته‌ هاوته‌ریبه‌، گه‌نده‌ڵی و به‌رتیل خواردن نییه‌، ده‌زانێت كه‌ناڕاسته‌وخۆ پڕۆسه‌ی چاره‌سه‌رییان كردۆته‌ ئامانج و به‌ئاشكراش جه‌خت له‌وه‌ ده‌كاته‌وه‌ كه‌ كه‌س ناتوانێت كورده‌كان وه‌كو ئامراز به‌كار بهێنێت. له‌ڕاستیدا ئۆجه‌لان، كه‌ئاماژه‌ به‌و هه‌وڵانه‌ی دژ به‌ حكومه‌ت ده‌كات، نه‌ك بۆ به‌رگریكردن له‌حكومه‌ت، به‌ڵكو ده‌یه‌وێت هۆشداری بدات به‌و حكومه‌ته‌ تاخێراتر هه‌نگاوی چاره‌سه‌ر بنێت و هه‌ست به‌مه‌ترسییه‌كان بكه‌ن. ئۆجه‌لان به‌سه‌رۆك وه‌زیران ده‌ڵێت: «ئه‌گه‌ر هه‌نگاوه‌كانی دیموكراتیزه‌كردن خێراتر نه‌هاوێژن، ده‌وڵه‌تی هاوته‌ریب و دامه‌زراوه‌ هاوته‌ریبه‌كان ده‌كه‌ونه‌ جوڵه‌ و وه‌ك مورسی، تۆش ده‌خه‌نه‌ زیندانه‌وه‌».


ئه‌گه‌ر به‌وردی سه‌یر بكه‌ن، ده‌وڵه‌تی هاوته‌ریب له‌م بڕوبیانووانه‌ی ئێستایدا ناهه‌ق نییه‌، چونكه‌ له‌ڕوانگه‌ی ده‌وڵه‌تی هاوته‌ریبه‌وه‌، دزیكردن و گه‌نده‌ڵی یه‌كێكه‌ له‌ئامرازه‌ ره‌واكانی خه‌بات. ئه‌گه‌ر دزیتان كردبێت، ناچارن له‌شوێنێك سزاكه‌ی وه‌ربگرن، كاردانه‌وه‌كانی سه‌رۆك وه‌زیران به‌رامبه‌ر به‌مه‌، زۆر ناشییانه‌یه‌ به‌شڵه‌ژاوییه‌كی زۆره‌وه‌ هه‌وڵده‌دات ده‌سه‌ڵاتدارێتی خۆی بسه‌پێنێت.


له‌وانه‌یه‌ جه‌هه‌په‌ هه‌وڵه‌كانی كوده‌تای ده‌وڵه‌تی هاوته‌ریبـی به‌دڵ بێت، هه‌رچییه‌ك بێت، خۆشیان میراتگری ئه‌م چه‌مكه‌ن، به‌ڵام كورده‌كانی توركیا، هه‌رگیز پشتگیریی كوده‌تایان نه‌كردووه‌، له‌لایه‌ن هه‌ر كه‌س و لایه‌نێكه‌وه‌ كرابێت، دژی هه‌موو جۆره‌ كوده‌تایه‌ك بوون.


له‌لایه‌كه‌وه‌ توركیا شایه‌تی ئه‌م هه‌ڵڵا و به‌زمه‌یه‌، له‌لایه‌كی دیكه‌شه‌وه‌ حه‌قیقه‌تی «رۆژاڤا» هه‌یه‌ و سیاسه‌ته‌كانی توركیا به‌رامبه‌ر به‌رۆژاڤا دیاره‌. ئێوه‌ چه‌ندین جار ره‌خنه‌تان له‌سیاسه‌ته‌كانی توركیا به‌رامبه‌ر به‌رۆژاڤا گرتووه‌. هه‌روه‌ها بابه‌تی رۆژاڤا هه‌ندێك لایه‌نی كوردیشی چه‌ند جارێك هێناوه‌ته‌ به‌رامبه‌ری یه‌ك وا به‌ره‌و كۆنفرانسی جنێڤ-2ش هه‌نگاو ده‌نێین، خوێندنه‌وه‌تان له‌مباره‌یه‌وه‌ چییه‌؟
- له‌كاتێكدا له‌توركیا پڕۆسه‌ی ئاشتی له‌گه‌ڵ كورده‌كان به‌رده‌وام بێت، ناكرێ له‌هه‌مانكاتدا دژایه‌تی كوردی پارچه‌یه‌كی تر بكرێت. جا ئه‌وه‌ چ رۆژاڤا بێت، یان باشوور و رۆژهه‌ڵات، جیاوازی نییه‌. له‌كاتێكدا توركیا له‌گه‌ڵ هاووڵاتییه‌ كورده‌كانی خۆیدا له‌ناو دۆخێكی ئاشته‌واییدایه‌، هه‌رگیز ناتوانێت له‌گه‌ڵ كۆمه‌ڵگه‌یه‌كی كوردیی دیكه‌دا دوژمنایه‌تی بكات ئه‌مه‌ هه‌م له‌لایه‌ن ئێمه‌وه‌ قابیلی قبوڵ نییه‌، هه‌م ده‌توانێ پڕۆسه‌ی ئاشتی له‌ناوخۆدا بكاته‌ «تۆزی بانان..». ئێمه‌ قه‌ت ناتوانین دۆخێكی وه‌ها قبوڵ بكه‌ین، باش ده‌زانین كه‌هێرشه‌كانی به‌ره‌ی نوسره‌ و قاعیده‌ بۆسه‌ر رۆژاڤا، له‌لایه‌ن توركیاوه‌ پاڵپشتی ده‌كرێت. «من كورده‌كانی ئه‌وێ سه‌ركوت ده‌كه‌م و له‌گه‌ڵ كورده‌كانی خۆشمدا ئاشت ده‌بمه‌وه‌». هه‌موو ئه‌مانه‌ ناكۆكین دره‌نگ یان زوو، توركیا ناچار ده‌بێت واز له‌م سیاسه‌تانه‌ی به‌رامبه‌ر به‌ رۆژاڤا بهێنێت.


ئه‌مه‌ چۆن ده‌كرێت؟ به‌رله‌ هه‌موو شت، پێویسته‌ كورده‌كان یه‌كڕیزی ناوخۆییان به‌هێزتر بكه‌ن، واته‌ بۆ ئه‌وه‌ی هه‌موو بزووتنه‌وه‌كانی كوردستان له‌ژێر سێبه‌ری كۆنگره‌یه‌كی نه‌ته‌وه‌ییدا كۆببنه‌وه‌، ده‌بێ هه‌نگاوه‌كانیان خێراتر بنێن. دووه‌م، كاتی به‌شداریكردن له‌كۆنفرانسی جنێڤ-2، ده‌بێ هه‌موو كورده‌كان پشتگیری كوردی رۆژاڤا بكه‌ن. ده‌بێت له‌ڕووی سیاسییه‌وه‌ پاڵپشتی ئه‌و وه‌فده‌ بكه‌ن كه‌به‌شدار ده‌بن له‌كۆنفرانسه‌كه‌دا. من وای بۆ ده‌چم ئه‌م پاڵپشتییه‌ ورده‌ ورده‌ زیاتر ببێت، خۆی كۆبوونه‌وه‌كه‌ی هه‌ولێریش له‌سه‌ر ئه‌و بنه‌مایه‌ بوو ئه‌و وه‌فده‌ی له‌ جنێڤ-2 دا نوێنه‌رایه‌تی كورد ده‌كات، له‌لایه‌ن هه‌ر سێ پارچه‌كه‌ی تری كوردستانیشه‌وه‌ پشتگیری ده‌كرێت، ئه‌م هه‌ڵوێسته‌ی كورده‌كان ده‌توانێت هۆكارێك بێ بۆ گۆڕانی سیاسه‌ته‌كانی توركیا. واته‌ كۆنفرانسی جنێڤ-2 ده‌بێته‌ كۆنفرانسێكی كاریگه‌ر له‌سه‌ر هه‌موو پارچه‌كانی كوردستان.


* كه‌مێك پێش ئێستا باسی هه‌وڵه‌كانی ئاشتیی ساڵی 1993 تان كرد كه‌ به‌ تورگوت ئۆزال-ه‌وه‌ ده‌ستی پێكرد. وه‌ك خۆشتان ده‌زانن، سه‌رۆك مام جه‌لال له‌و قۆناغه‌دا هه‌وڵ و هاوكارییه‌كی زۆری پێشكه‌ش كرد. هه‌روه‌ها سیاسه‌تی (ی.ن.ك)یش به‌رامبه‌ر به‌ مه‌سه‌له‌ی رۆژاڤا، هه‌ر له‌سه‌ره‌تاوه‌ ئاشكرا بوو. لێره‌دا، پێش هه‌موو شت رۆڵی مام جه‌لال و پاشان یه‌كێتیی نیشتمانیی كوردستان چۆن هه‌ڵده‌سه‌نگێنن؟
-به‌م دواییانه‌، له‌سه‌ر بانگهێشتی (ی.ن.ك) سه‌ردانی سلێمانیمان كرد، له‌وێ له‌لایه‌ن خاتوو هێرۆ ئیبراهیم ئه‌حمه‌د و مه‌لا به‌ختیاره‌وه‌ پێشوازیی كراین. جارێكی دیكه‌ش بینیمان كه‌ یه‌كێتیی نیشتمانیی كوردستان، به‌ ئاشكرا سووربوونی خۆی له‌سه‌ر سیاسه‌تی هاوكاریكردنی شۆڕشی رۆژاڤا دووپات ده‌كاته‌وه‌، ئه‌مه‌ له‌ڕوانگه‌ی ئێمه‌وه‌ هه‌ڵوێستێكی دروست و شه‌ره‌فمه‌ندانه‌یه‌.


رۆڵی (ی.ن.ك) له‌به‌ڕێوه‌چوونی پڕۆسه‌ی ئاشتیی توركیاشدا زۆر گه‌وره‌و به‌رچاوه‌، به‌تایبه‌ت هه‌وڵه‌كانی مام جه‌لال له‌و باره‌یه‌وه‌ فه‌رامۆش ناكرێت. دواقۆناغیش كه‌ده‌ستی پێكرد، له‌ڕاستیدا هه‌ر به‌ هه‌وڵ و ماندوبوونی مام جه‌لال بوو. له‌كاتی داڕشتنی بناغه‌ی ئه‌و قۆناغه‌ی دواییدا، مام جه‌لال رۆڵی خۆی گێڕاوه‌. به‌داخه‌وه‌ ره‌وشی ته‌ندروستی به‌ڕێزیان بواری نه‌دا كه‌ راسته‌وخۆ به‌شداری بكات له‌م قۆناغه‌دا، له‌ڕاستیدا ده‌یوست خۆی وه‌ك سه‌رۆك كۆماری عیراق بچێته‌ ئیمرالی و سه‌ردانی ئۆجه‌لان بكات. خواستێكی وای هه‌بوو، پشت به‌خوا له‌ماوه‌یه‌كی كورتدا چاك ده‌بێته‌وه‌و، به‌رده‌وام ده‌بێت له‌هاوكاریكردنی هه‌رێمی كوردستان و عیراق و كورده‌كانی توركیاش.


هه‌ڵوێست و سیاسه‌تی جوامێرانه‌ی یه‌كێتیی نیشتمانیی كوردستان له‌مباره‌یه‌وه‌، كاریگه‌ری ده‌بێت بۆ سه‌ر یه‌كڕیزیی كورده‌كان. هه‌روه‌ها له‌و باوه‌ڕه‌دام كه‌ڕاستگۆیی و هه‌وڵه‌كانی یه‌كێتی سه‌باره‌ت به‌به‌ڕێوه‌چوونی كۆنفرانسه‌كه‌ش، حزبه‌ كوردییه‌كانی دیكه‌ بهێنێته‌ سه‌ر ئاراسته‌یه‌كی ئه‌رێنی.


به‌ڕای ئێمه‌، بۆ تێپه‌ڕاندنی ئه‌و ئاسته‌نگ و ناڕه‌حه‌تییانه‌ی كه‌ هاتنه‌ به‌رده‌می كۆنفرانسی كورد، ده‌بێ هه‌موو حزب و لایه‌نه‌ كوردییه‌كان به‌ له‌خۆبوردووییه‌كه‌ی زیاتره‌وه‌ هه‌ڵسوكه‌وت بكه‌ین، چونكه‌ كۆمه‌ڵگه‌ی كوردی، ئیتر له‌هه‌ر لایه‌كه‌وه‌ پێویستی به‌ یه‌كڕیزییه‌، پێویستی به‌سازدانی ئه‌و كۆنفرانسه‌یه‌. ده‌بێ سه‌ركرده‌كان و حزبه‌كانمان زیاتر سه‌رنج بده‌نه‌ میلله‌ت و ده‌نگی شه‌قام و كۆڵانه‌كان باشتر ببیستن، به‌مجۆره‌ سیاسه‌ت بكه‌ن. ئه‌گه‌ر لێره‌وه‌ سه‌یری بابه‌ته‌كه‌ بكه‌ین، ده‌توانم بڵێم كه‌ یه‌كێتیی نیشتمانیی كوردستان له‌چاو حزبه‌كانی دیكه‌، له‌ئاستێكی ئیجابی دایه‌. چاوه‌ڕێ ده‌كه‌ین به‌م زووانه‌ مه‌لا به‌ختیار سه‌ردانێكی شاری ئامه‌د بكات دوای ئه‌وه‌ی له‌ئامه‌د پێشوازیی لێكرا، له‌و باوه‌ڕه‌دام كه‌په‌یوه‌ندییه‌كانی به‌ده‌په‌ و (ی.ن.ك) زیاتر به‌هێز ببێت.


با بێینه‌ سه‌ر باسی هه‌ڵبژاردنه‌ خۆجێییه‌كان، له‌ هه‌ندێك شوێن، خه‌ڵك دژی سیستمی دیاریكردنی كاندیده‌كانی به‌ده‌په‌ بوون. خه‌ڵكه‌كه‌ زیاتر حه‌ز ده‌كه‌ن دانیشتووی شاره‌كانی خۆیان كاندید بكرێت، به‌ڵام كه‌سه‌یری شێوازی دیاریكردنی كاندیده‌كانی ئه‌مجاره‌ی به‌ده‌په‌ ده‌كه‌ین، تابلۆیه‌كی جیاواز دێته‌ به‌رچاو، وه‌كو به‌ده‌په‌، پێوه‌ره‌كانتان بۆ ده‌ستنیشانكردنی كاندید چین؟


-له‌ڕاستیدا پێویسته‌ له‌ئیداره‌ی خۆجێییدا، ئیداره‌یه‌كی په‌یوه‌ست به‌ناوچه‌كه‌ به‌بنه‌ما وه‌ربگیرێت وه‌كو مه‌بده‌ئیش ئێمه‌ هه‌میشه‌ به‌رگریمان له‌مه‌ كردووه‌، له‌هه‌ندێك شوێن له‌به‌ر ئه‌وه‌ی خودی ناوچه‌كه‌ له‌سه‌ر دیاریكردنی كاندیدێك ساغ نه‌ده‌بوونه‌وه‌، ئێمه‌ش به‌باشمان زانی له‌هه‌ندێك شوێنی تر كادیری حزبی و نوێنه‌ری حزبی بهێنین و وه‌ك كاندید پێشنیاریان بۆ بكه‌ین و به‌گشتیش قبوڵ كراوه‌. به‌تایبه‌ت له‌ناوه‌نده‌ بچووكه‌كان، ئه‌م جۆره‌ ئاسته‌نگانه‌مان هاتۆته‌ پێش، ژماره‌یه‌كی زۆر كاندید ده‌رده‌كه‌ون و دواتر له‌ناوخۆیاندا رێك ناكه‌ون بۆئه‌وه‌ی ژماره‌یان كه‌م ببێته‌وه‌. له‌بارودۆخی وادا، كاندیدێك له‌ده‌ره‌وه‌ی ناوچه‌كه‌ بهێنرێت، زیاتر ده‌بێته‌ هۆی كۆكردنه‌وه‌ی په‌رش و بڵاوییه‌كان، واته‌ كاندیدێك باشتره‌ كه‌ له‌باتی ئه‌وه‌ی نوێنه‌رایه‌تی عه‌شیره‌تێك یان بنه‌ماڵه‌یه‌ك بكات، زیاتر حزبی بێت و ته‌نها نوێنه‌رایه‌تی حزبه‌كه‌ی بكات، ئه‌مه‌ ئه‌نجامی باشتری ده‌بێت، جگه‌ له‌م حاڵه‌تانه‌، له‌هه‌ر شوێنێك كاندیدێك دیاری كرابێت و كێشه‌ و ناكۆكی له‌سه‌ر نه‌بووبێت، ئێمه‌ش قبوڵمان كردووه‌. له‌ده‌ستنیشانكردنی كاندیده‌كاندا، وه‌ك به‌ده‌په‌، به‌تایبه‌ت ئه‌م پێوه‌رانه‌مان له‌به‌رچاو گرتووه‌: نیشتمانپه‌روه‌ر بێت، رێز له‌به‌هاكانی خه‌ڵك بگرێت، نوێنه‌رایه‌تی رێباز و سیاسه‌ته‌كانی به‌ده‌په‌ بكات، پاش ئه‌وه‌ی ده‌نگی هێنا، توانای به‌ڕێوه‌بردنی كاروباری شاره‌وانی هه‌بێت و له‌هه‌موو شوێنێكیش بۆ ئه‌وه‌ی ژن به‌شداریی چالاكانه‌یان هه‌بێت، هاوسه‌رۆكێكی ژنیشمان بۆیان ده‌ستنیشان كردووه‌. ئه‌گه‌ر سه‌داسه‌دیش ئه‌م چاوه‌ڕوانییانه‌مان نه‌هاتبێته‌ دی، وای بۆده‌چم كه‌ تا ئاستێكی باش سه‌ركه‌وتنمان به‌ده‌ست هێناوه‌.


ناتوانم بڵێم له‌هه‌موو شوێنێك كاندیدی بێ كه‌موكوڕیمان ده‌ستنیشان كردووه‌، ئه‌مه‌ پێچه‌وانه‌ی یاساكانی ژیانه‌، به‌ڵام كورده‌كان به‌م هه‌ڵبژاردنه‌، هه‌نگاوێكی گه‌وره‌ به‌ره‌و دیموكراسی ده‌هاوێژن.


ئێمه‌ گه‌لێكین كه‌دره‌نگ پێمان ناوه‌ته‌ ناو دنیای دیموكراسییه‌وه‌. له‌كاتێكدا ده‌وڵه‌تانی دنیا 300 ساڵه‌ رێگه‌ی دیموكراسی و مافی مرۆڤیان بڕیوه‌، ئێمه‌ له‌م 50 ساڵه‌ی دواییدا، به‌تایبه‌تیش 20 ساڵی دوایی، زیاتر له‌م پێناوه‌دا خه‌باتمان كردووه‌. وێڕای ئه‌مه‌ش، كورده‌كان له‌ناوخۆیاندا زۆر به‌ خێرایی پێش ده‌كه‌ون له‌چاو زۆربه‌ی ده‌وڵه‌تانی ئه‌وروپا، چه‌مكی مافی مرۆڤ لای كورده‌كان زیاتر چه‌سپاوه‌. كورده‌كان دژی له‌سێداره‌دانن، دژی پێشێلكردنی مافه‌كانی مرۆڤن، به‌رامبه‌ر به‌مافه‌كانی ژن و گرنگی ژینگه‌ هۆشیارترن. سه‌ره‌ڕای هه‌موو ئه‌مانه‌، نابێ سه‌باره‌ت به‌ به‌ڕێوه‌به‌رایه‌تییه‌ خۆجێییه‌كان رێگه‌یه‌كی زۆر ببڕین. دوای ئه‌م هه‌ڵبژاردنه‌، كه‌موكوڕییه‌كانمان ده‌ستنیشان ده‌كه‌ین و له‌هه‌ڵبژاردنی داهاتووشدا موناقه‌شه‌ی ئه‌وه‌ ده‌كه‌ین كه‌چۆن دیموكراسی نێوخۆییمان به‌هێز بكه‌ین. دیموكراسی رێگه‌یه‌كی سه‌خته‌، به‌ڵام شێوه‌ ژیانێكی زۆر جوانیشه‌. بۆیه‌ش پێویسته‌ له‌ناخه‌وه‌ له‌گه‌ڵیدا بژین.

 

Copyright © 2012. all rights reserved . Developed by Avesta Group and powered by Microsoft Azure