هەواڵ

-

كارگەی دارتاشیی‌و ئاسنگەریی پەروەردە کێشەی هەیە ‌

هێڤی رەمەزان‌
9/24/2014 3:48:12 AM 809 ‌جار خوێندراوه‌ته‌وه

دەنگی ئامێری ئاسنگەریی‌و دارتاشی دەگاتە دەرەوە، ئەوەی لەئێستادا هەیە رۆڵێكی ئەوتۆ نابینێت لەچاككردنەوەی كەلوپەلە شكاوەكان، چونكە وەك بەڕێوەبەرەكەیان دەڵێت؛ بەهۆی كەمی بودجەو قەیرانی داراییەوە، ناتوانن پێویستی تەواو بۆ چاككردنەوەی كورسی‌و بۆردو كەلوپەلەكانی تری ناو پۆلەكان بكڕن.
كارگەی ئاسنگەری‌و دارتاشی (وەرشە) بەشێكە لەبەڕێوەبەرایەتی پەروەردەی سلێمانی‌و ئەركی چاككردنەوەی كەلوپەلە شكاوەكانی قوتابخانەو خوێندنگەكان دەگرێتەئەستۆ.
درێغی ناكەن
هەموو ساڵێكی خوێندن كۆمەڵێك گرفتی لەگەڵدایە، بەتایبەتی كەمی بینای خوێندن‌و كەمی مامۆستاو كەمی كتێب، ئەمساڵیش پێدەچێت كێشەی چاككردنەوەی كەلوپەلە پێویستەكانی ناو پۆلیشی بێتەسەر.
لەوبارەیەوە مامۆستا ستار عیسا بەڕێوەبەری خوێندنگەی شوانی بنەڕەتی بۆ كوردستانی نوێ وتی: «ساڵانە لەخوێندنگەكەمانداو لە كۆتایی وەرزی دووەم یان سەرەتای وەرزی خوێندن، بەهاوكاری مامۆستایان‌و خوێندنكارەكانمان كەلوپەلە شكاوەكان لەلای خۆمان چاكدەكەینەوە، خۆمان ئەو شتانەی پێویستە دابینی دەكەین»، بەڵام باسی لەوەشكرد؛ چاككردنەوەی هەر كەلوپەلێك لەتوانای خۆیاندا نەبێت، دەینێرن بۆ كارگەی دارتاشی‌و ئاسنگەری لەپەروەردەی سلێمانی‌و ئەوان بۆیان چاكدەكەنەوەو درێغی ناكەن.
كەلوپەلیان نییە
بەردەوام وەرشەی پەروەردە رۆڵێكی دیارو كاریگەری هەبووە لەچاككردنەوەی سەرجەم ئامێرو كەلوپەلی خوێندنگەكان، بەڵام ئەوەی ئێستا دەبینرێت ئیش‌و كارەكانیان سست بووە.
سەبارەت بەكاروبارەكانیان، فاروق رەئوف بەڕێوەبەری كارگەی دارتاشی‌و ئاسنگەری لەپەروەردەی سلێمانی بۆ كوردستانی نوێ وتی: «هۆكاری سستی‌و كەمبوونەوەی ئیش‌و كارەكانمان دەگەڕێتەوە بۆ كەمبوونەوەی كەلوپەلی پێویست، كە لەئێستادا بەهۆی قەیرانی دارایی‌و نەمانی بودجەوە كاریگەری زۆری بۆ ئێمە هەبووە، چونكە تەنها بۆ شتە زۆر پێویستەكان دەتوانین مەوادی پێویست بكڕین، بۆ نموونە؛ كورسی بۆ خوێندنگەكان‌و ئەوانەی بۆ خوێندكار پێویستن، هەروەها كۆمەڵێك مەوادی كۆن‌و موڵكی یونسێفمان هەیە، كە ماونەتەوەو ئەوانیش بۆ كاتە پێویستەكان بەكاردەهێنین».
بەوتەی بەڕێوەبەرەكە، هەر ئیشێك پارەی زۆری پێویست نەبێت، دەتوانن جێبەجێی بكەن، ئێستاش خەریكی دروستكردنی هەندێك كەلوپەلی پێویستن بۆ باخچەی ساوایان، كە تازە كراونەتەوەو پێویستیان بەو كەلوپەلانە هەیە.
چاكیان دەكەنەوە
ئەوەی هەموومان دەیزانین ئەو ئاوارانەی لەخوێندنگاكاندا نیشتەجێبوون، جێدەستی خۆیان لەشكاندنی كۆمەڵێك تەختەو پێویستی خوێندكاران لەخوێندنگەكاندا دیاری كردووە، سەبارەت بەچاككردنەوەی ئەو كەلوپەلانەش، فاروق رەئوف دەڵێت: «تا ئێستا هیچ كەلوپەلێكی شكاومان بۆ نەهاتووە تا چاكی بكەینەوە، بەڵام هەندێك قوتابخانە سەردانمان دەكەن بۆئەوەی كورسی ناو پۆلەكانیان بۆ دابین بكەین، بەڵام وەك ئەوەی شتی شكاو بێت بۆمان نەهاتووە، ئەگەر واش بێت ئێمە لەكارگەكەمان چاكیان دەكەینەوە».
سەبارەت بەدامەزراندنی ئەو كەسانەی دەرچووی بەشە پیشەییەكانن، ئەو بەڕێوەبەرە وتی: «ئێستا دامەزراندن نەماوە، ئەگەرنا ئەو كەسانە لەلای ئێمە دادەمەزرێن».

Copyright © 2012. all rights reserved . Developed by Avesta Group and powered by Microsoft Azure