هەواڵ

-

ئەو خۆراكانەی كۆرپەلە لە نەخۆشی زگماكی دەپارێزن

m9sharazoor
7/23/2013 8:06:31 AM 516 ‌جار خوێندراوه‌ته‌وه

خانمانی دووگیان جیاواز لە ساتەكانی پێش سكپڕی دەبێت ستایلی ژیانیان بگۆڕن، هەروەها دەبێت سیستمی خۆراكی تایبەتیان هەبێت، بۆئەوەی هەم خۆیان و هەم كۆرپەكانیان بەدوور بگرن لە نەخۆشی.

 

دەمانەوێت ناوی هەندێك لەو خۆراكانەتان پێ‌ ئاشنا بكەین كە لە تەمەنی سكپڕیدا سەرباری بوونی زۆربەی كانزاو ڤیتامینەكان، بەڕێژەیەكی باش (ترشی فۆلیك) یان تێدایە...
1. نیسك: یەكێكە لە خۆراكە دەوڵەمەندەكان بە ترشی فۆلیك، بۆیە دەتوانن لەسەر سفرەی خوانەكانتان ئەم خۆراكە رۆژانە ئامادە بكەن، بەجۆرێك نیو كوپ نیسك (50%) ی پێداویستی رۆژانەت بۆ دابین دەكات، هەروەها (180) مایكرۆگرام فۆلیكی تێدایە، جگەلەوەش نیسك كانزای ئاسن و ریشاڵ و كاربۆهیداراتی بەڕێژەی جیاواز تێدایە.
2. سەوزەی گەڵادار: سەوزە گەڵادارو سەوزەكانی تر بڕێكی زۆر ڤیتامین و ترشی فۆلیكیان تێدایە، سپێناخی تازە لە لیستی سەرەوەی سەوزە دەوڵەمەندەكانە بە ترشی فۆلیك، تەنها دوو كوپ سپێناخی كوڵاو نزیكەی (218) مایكرۆگرام ترشی فۆلیكی تێدایە، بەڵام لە نیو كوپ كەلەرم و تووردا نزیكەی (50 - 90) مایكرۆگرام ترشی فۆلیك هەیە.
3. میوە ترشەكان: پرتەقاڵێكی گەورە (55) مایكرۆگرام ترشی فۆلیكی تێدایە، گەر توانیت بەشێوەی شەربەت بیخۆیت ئەوا (74) مایكرۆگرام ترشی فۆلیكت لە خواردنەوەی پەرداخێكدا دەستكەوتووە.
4. برۆكلی: تەنهایەك كوپ لە برۆكلی (104) مایكرۆگرام ترشی فۆلیكی تێدایە، واتە یەك لەسەر چواری پێداویستی رۆژانەی ژنانی دووگیان دابین دەكات، هەروەها برۆكلی سەرچاوەیەكی باشی ڤیتامین سی (Vitamine C) و بێتاكارۆتین و كالیسیۆم و ئاسنە.
5. نان و بەرهەمەكانی دانەوێڵە: ئەو خۆراكانەی لە گەنم دروست دەكرێن دەوڵەمەندن بە ترشی فۆلیك، هەروەها ئەو خۆراكانەی لە پێكهاتەی دانەوێڵەن ترشی فۆلیكیان بۆ زیاد دەكرێت، بۆ نمونە ئەو مەعكەرۆنەی كە لە دانەوێڵە دروستدەكرێت (100) مایكرۆگرام ترشی فۆلیكی تێدایە، هەروەها پارچە نانێك (60) مایكرۆگرام ترشی فۆلیكی تێدایە.
6. ناوكی گوڵەبەڕۆژە: مشتێك گوڵەبەڕۆژە (82) مایكرۆگرام، بۆیە ئامۆژگاریتان دەكەین لەكاتی تەمەنی سكپڕیدا گوڵەبەڕۆژە بخۆن، بەڵام بەمەرجێك سوێركراو نەبێت.
7. شەربەتی تەماتە: بڕێكی كەم شەككری تێدایە ترشی فۆلیكی زۆر تێدایە، نزیكەی (48) مایكرۆگرام فۆلیكی تێدایەو ڤیتامین C و كانزای ئاسنی تێدایە.
8. فاسۆلیای سوور: باشترین خۆراكەو پێویستە بۆ خوانی خۆراكیت زیادی بكەیت، چونكە نیو كوپ فاسۆلیای كوڵاو (115) مایكرۆگرام ترشی فۆلیكی تێدایە.
9. ئەڤۆكادۆ: میوەیەكی ئەمریكییەو سێوی زستانەشی پێدەوترێت، یەك ئەڤۆكادۆ (90) مایكرۆگرام ترشی فۆلیكی تێدایە، هەروەها دەوڵەمەندە بە رۆنی ئۆمێگا سێ‌ (Omega 3) كە مادەیەكی گرنگە بۆ گەشەی مێشكی كۆرپەلەو تەندروستی دڵی دایكەكە.
10. هلیۆن (Asparagus): سەوزەیەكی دەریاییە و رەگ و لقەكانی دەخورێت و (79) مایكرۆگرام ترشی فۆلیكی تێدایە، هەرچەندە لە بازاڕەكانی هەرێمدا ئەم سەوزەیە تائێستا نیە.

 

 

Copyright © 2012. all rights reserved . Developed by Avesta Group and powered by Microsoft Azure