هەواڵ

-

داعش متمانەی نێوان پێكهاتەكانی شێواند ‌

لۆنا دڵشاد مەریوانی
8/14/2014 3:12:41 AM 547 ‌جار خوێندراوه‌ته‌وه

داعش، ئەو ناوە ترسناكەیە كە ئێستا لەزەینی هەمووماندا وشەیەكە پەیوەستە بەكوشتن‌و سەربڕین‌و دەستدرێژیی كردنە سەر ژنان‌و...هتد، بەڵام لەكاتێكدا ئێمە ئەو هەموو هەواڵە تۆقێنەرو قێزەونە لەسەر داعش دەبیستین‌و دەبینین. راستییەك هەیە كە هەموو لەناخماندا دركمان پێی كردووە هەر ئەو راستییەشە وای كردووە هیچ هێرشێك تا ئێستا بۆ سەر نەتەوەكەمان لەم هێرشە ترسناكترو مەترسیدارتر نەبووبێت لەلای تاكی كورد، هۆكاری ئەمەش ئەوەیە داعش هێزێك‌و ئایدۆلۆژیایەك نییە لەهەسارەیەكی ترەوە یان لەوڵاتێكی دوورەوە هاتبێت. داعش دەكرێت هەر یەكێك لەئێمە بێت. دەكرێت ئەو دراوسێ ریشنە مڕومۆچەت بێت كە هەرچەند بەسفووری دەتبینێت مۆڕەت لێدەكات، یان ئەو هاوپۆلە دیندارەت بێت لەزانكۆ كە نایەتە هیچ وێنەیەكەوە كە كچی تێدا بێت‌و لەژیانیدا بۆ یەك سەیران‌و ئاهەنگ نایەت، ئەمە مانای ئەوە نییە كە ئەو جۆرە كەسانە داعشن یان فیكری داعشیان لا پەسەندە، نەخێر دەكرێت هەر یەكێك لەوانە ئامادە بێت لەپێناوی برایەكی مەسیحی یان ئێزیدیدا بكوژرێت، بەڵام ئەمە مانای ئەوەیە متمانە لەناو خەڵكدا كەمی كردووە، چونكە هەموو دەزانین داعش كوردوعەرەب‌و تورك‌و فارس‌و هەموو نەتەوەكانی دراوسێمانیانی تێدایە، هەروەها لەتۆڕە كۆمەڵایەتییەكان بەردەوام كەسانێك دەبینین كۆمێنت دەنووسن لەبەرژەوەندی‌و پشتگیریی داعش، دەزانین كە خانەی خەوتووی داعش لەنێوانماندا هەیە یان هیچ نەبێت كەسانێك لەنێوانماندان كە هەر كاتێك داعش هێرش بهێنێت ئەوانیش دەچنە پاڵیان‌و دەست دەكەن بەشەڕو كوشتارو رێ نیشاندەریان دەبن بۆ ماڵی ئەو كەسانەی كە موسوڵمان نین یان هەر رۆژێك لەڕۆژان رەخنەیان لەئیسلام گرتووە، بۆیە ئەوەی داعش كردوویەتی ئەوەیە متمانەی خەڵكی بەیەكتر كەمكردۆتەوە، دراوسێ مەسیحییەكەمان چیتر متمانەی بەوە نەماوە كە لەنێوانماندا ژیانی پارێزراو بێت، بەتایبەت دوای ئەوەی بەسەرهاتی مەسیحییە ئاوارەكانی موسڵی بیستووە، جاران كە ئەو دراوسێ موسوڵمانەی بەجەژن دەچوو بۆ سەردانی‌و پێی وتبوو: وڵڵا من هیچ مەسیحییەكم خۆش ناوێت ئێوە نەبێ (ئەمە لای خۆی حاجی ژن بوو) ئەمە ئەوسا قسەیەكی ئاسایی بوو لەلای دراوسێ مەسیحییەكەمان‌و بەدڵێكی فراوانەوە وەری گرتبوو، بەڵام لەمەودوا خوێندنەوەی زۆری بۆ دەكات، هەمان شت راستە بۆ ئێزیدییەكانیش كە لەڕاپۆرتێكی (بی بی سی)دا وتبوویان چیتر ناتوانین بگەڕێینەوە بۆ سەر ماڵ‌و حاڵی خۆمان، چونكە متمانەمان بەدراوسێ عەرەبە موسوڵمانەكانمان نەماوە، چونكە ئەوان یارمەتی داعشیان داوەو رێ نیشاندەریان بوون، بەڵام كێشەی گەورەتر ئەوەیە داعش متمانەی لەنێوان موسوڵمانانیشدا نەهێشتووە، موسوڵمانێكی میانڕەو چیتر متمانەی تەواوی بەهیچ موسوڵمانێك نەماوە كە یەك تۆز ئاینەكەی تووندتر لەخۆی گرتبێت.
ئەوەی راستی بێت داعش گورزێكی هێندە قورسی لەئایینی ئیسلام داوە كە هەستانەوە لێی پێویستی بەهەوڵ‌و هیلاكییەكی زۆر هەیە، چونكە لەكاتێكدا قاعیدەو تاڵیبان ئیسلامیان لەبەرچاوی خۆرهەڵات‌و وڵاتانی ئەورووپادا شێواندو متمانەی خەڵكەكەیان پێی نەهێشت، داعش متمانەی موسوڵمانان خۆیانی بەیەكتر نەهێشت‌و گومانی لادروستكردن بۆ ئاینەكەیان.
چیتر زۆرێک لەئێمە هەرچەند وشەی(جیهاد، فەتح، سەربڕین...تاد) لەقورئاندا دێتە بەرچاوی خێرا وێنەی كوشتارو زوڵم‌و خوێن رشتنەكەی داعش‌و وێنەی برا ئێزیدییە برسی‌و تینوو و دەربەدەرەكانی دێتەوە پێش چاو، من نامەوێت بڵێم چیتر هیوا نەماوە بۆ ئێمەی موسوڵمان، بەڵام پێموایە یەكەم شت دەتوانین بیكەین‌و لایەنە پەیوەندیدارەكان بیكەن ئەوەیە چاودێرییەكی تەواو بخەنە سەر جموجۆڵی ئیسلامییەكانی هەرێم‌و تۆڕە كۆمەڵایەتییەكان تا بتوانن رێگریی لەهەموو مەیلێك بكەن، که‌ بەلای دەمارگیریی‌و تووندڕەویداو كەسایەتییە ئاینییە پۆزەتیڤەكانیش رۆڵی كاریگەری خۆیان ببینن‌و قسە بۆ ئەو گەنجانە بكەن، كە گومانی دەمارگیرییان لەسەرە، ئەوانەش كە مێشكی گەنـجان پڕ دەكەن لەفیكری تووندڕەوانە لێپێچینەوەیان لەگەڵدا بكرێت‌و رێگریان لێبكرێت، بەڕای من ئەمە هەنگاوی دووەمی دوای شەڕی سەنگەرەكانە دژی داعش، چونكە راستە درەنگ یان زوو داعش تێكدەشكێت، بەڵام فیكرو ئایدۆلۆژیایان لەناوماندا وەك خانەی شێرپەنـجەیی دەمێنێتەوەو ئەگەر بنبڕ نەكرێت دیسان بەشێوەیەكی ترو لەلایەكی ترەوە سەر هەڵدەداتەوە.

Copyright © 2012. all rights reserved . Developed by Avesta Group and powered by Microsoft Azure