هەواڵ

-

ناخۆش بەختانە ‌

د.عیزەدین مستەفا رەسول
9/18/2014 3:31:05 AM 532 ‌جار خوێندراوه‌ته‌وه

ئەی خوا بتانگرێ -زۆر بێ و بۆر بێی ناو راگەیاندن-كورد- ئەڵێ: بەدبەختە-یا بەختەوەرە. یا بەكچ دەڵێن؟ (بە بەختی چاك بی). شیعریشم زۆر لەبەردەمدایە كەباس لە(بەخت دەكا). با نەچمەوە سەر دیوانەكان و نموونەی زۆر بهێنمەوە. هەر ئەوەندەم لەبیرە حاجی قادر-باسی(بەختی كەچ)ی خۆی دەكا. كە لەبەختی كەچی (خامەنووكی شكا) واتە قەڵەمەكەی نووكی شكاو ئیتر شتی تری پێ نەنووسرا، بەڵام ئەمەی لەڕۆژنامەیەكی ئەم رۆژانەدا بینیم كابرا دەڵێ (ناخۆش بەختانە). دە هەر بنووسە (بەدبەختانە)و ئەم (ناخۆش بەختانە)یەم پێچەوانەی (خۆش بەختانە) بۆ دروست مەكە. تا بڵێن: خۆت و رۆژنامەكەت كوردی زانی چاكن. دەك خوابیبڕێ ئەم (زۆر بێ و بۆر بێ) تووڕە مەبن. ئەژمار كردن: من هەر (ژماردن)م بیستبوو- هەر لەو سەرچاوەیەوە (ژماردی، ئەیژمێرێ، بیژمێرە، ژمێررا)م بیستبوو. تا تەمەنێكیش- هەر(موحاسیب)م بیستبوو، نەكرابوو بەكوردی كەبڵێین (ژمێریار) كە بۆ (عەداد)یش دەوترا. یەكەمجار لەساڵانی سەدەی پێشوودا، لەكۆنگرەیەكی (خوێندكارانی كورد)دا لەئەڵەمانیا، كاك سەعدی دزەیی وشەی (ئەژمێر)ی بۆ (موحاسیب) دانا. جا نازانم لەخۆیەوە داینابوو، یا لەناوچەی ئەواندا ئەو وشە كوردییە پێش ئێمە سلێمانی دروستكرابوو. هەر لەو كۆنگرەیەدا كەڕوومكردە دوكتۆر كەمال فوئاد (یادی بەخێرو سەلامەتی بێ) كەئەو لەكۆنگرەكاندا بوو بە(فیلتەری) زمانی كوردی وامزانی كاك كەمال رازینابێ. بەڵام لەبەر هەر شتێك بێت، فتوای داو وتی: وادیارە لەناوچەكەی كاك سەعدیدا (واتە-دزەیی). (ئەژمێر)ی پێ دەڵێن-ئیتر بوو بەوشەو بە(ناونیشان)و تائێستاش هەر ماوەو تازە (ئەژمیر) بەمن ناكرێتە (ژمێریار) با بڵێین (بژمێر). ئیتر وا هەیەو با وابێ.
*****
بەخێرهێنانەوە: نازانم پێشتر لەسەر ئەم بەواتای ئێستا (دەستەواژە)یەم نووسیوە یا نا. بەڵام وا ئەمجارەش دەنووسمەوە. چونكە هەموو رۆژ دەیبیستمەوە.
كورد دەڵێن: چووین بۆ بەخێرهاتنەوەی. كەدەشچن دەڵێن: یاخوا بەخێر بێیتەوە. یا حاجی لەحەج هاتەوە، یاخوا بەخێربێتەوە. بەڵام ئێستا ئەم (بەخێرهێنانەوە)یە پەیدا بووە نازانم بۆ چیمانە. شتی تازە بۆ ئەوەیە كەنیمانە. یا ئەوەیە كە زمانیترو زمانی دراوسێ هەیەو خۆمان نیمانەو حەز ئەكەین بیكەین بەكوردیی پەتی. خۆ ئەوەتا هەردوو دەستەواژە (بەخێر هاتنەوە)و (بەخێر هێنانەوە)ی (سەقەتیش) هەر وشەی (خیر)ی عەرەبی یان تێدایە. كە لەقورئانی پیرۆزەوە لەعەرەبی فەسیحدا بەرامبەر بەوشەی (شر) دەیبینین. زۆر جوانە كەوشەی (شر) لەكوردیدا بووە بەوشەیەك بەرامبەر بە(جەنگ) یا بەگژیەكچووندا-كەدەڵێ: شەڕیان لەگەڵ یەكدا كرد یا (كەوتنە شەڕو شۆڕ) با ئەم (شەڕ)ەش بمێنێ و دیار وشە لەزمانی دراوسێیەوە بەمانایەكی نزیك نەك(كتومەت) وەك ئەو وەردەگیرێ، خۆ (جەنگ)یش فارس بەكاری دەهێنێ. بەهەموو جۆرێك-ئەم (بەخێرهێنانەوە)یەم لاجوان نییەو لەچەند كەسم پرسی نەك (دیالیكت یا بەشە دیالێكتی تر) بێت بەهەموو حاڵێك با(بەخێرهاتنەوە)بمێنێ و ئێوەش بەخێربێنەوە.

Copyright © 2012. all rights reserved . Developed by Avesta Group and powered by Microsoft Azure