هەواڵ

-

پەیامى سەرۆکی هەریم و ...........

مەلا بەختیار
7/23/2013 7:55:17 AM 819 ‌جار خوێندراوه‌ته‌وه

په‌یامی‌ سه‌رۆكی‌ هه‌رێم‌ و هه‌مواركردن ‌و هه‌موارنه‌كردنی‌ ده‌ستوور
بۆ سێ‌ مانگ ده‌چێت، مه‌سه‌له‌ی‌ هه‌ڵبژاردنه‌وه‌ی‌ سه‌رۆكی‌ هه‌رێم‌و هه‌مواركردنی‌ ده‌ستورو سازانی‌ نیشتمانی‌، پێخۆری‌ چه‌وری‌ میدیای‌ كوردی‌و سیاسه‌تی‌ پروپاگه‌نده‌ی‌ هه‌ڵبژاردنی‌ ئۆپۆزسیۆنه‌. نه‌ك ته‌نها هێزه‌كانی‌ ئۆپۆزسیۆن‌و میدیای‌ ئه‌هلی‌، به‌ڵكو له‌ناو خودی‌ یه‌كێتی‌‌و پارتیشدا، قسه‌و باس له‌سه‌ر ئه‌و بابه‌تانه‌، هێشتا گه‌رم‌وگوڕه‌. ته‌نانه‌ت، كه‌سانی‌ وا هه‌ن، یاری‌ به‌ سۆزی‌ رای‌ گشتی‌ ده‌كه‌ن‌و بونه‌ته‌ هه‌ڵوێستفرۆشی‌ مه‌یدانی‌ ئه‌م باسانه‌، له‌ مێژووی‌ ململانێكانی‌ یه‌كێتی‌‌و پارتیدا، چ له‌كاتی‌ شه‌ڕی‌ ناوخۆ و چ له‌كاتی‌ شه‌ڕی‌ سارددا، هه‌میشه‌ ئه‌مانه‌ سیكۆتینیان كردۆته‌ ژێر كڵاوه‌كانیان، نه‌كا بای‌ ناكۆكیه‌كان بیباو به‌رژه‌وه‌ندییان بكه‌وێته‌ مه‌ترسیه‌وه‌. ئه‌مه‌ له‌كاتێكدا هاوسه‌نگه‌ره‌كانیان له‌پێناوی‌ یه‌كێتی‌‌و دیموكراسی‌، پۆل پۆل شه‌هید ده‌كران. كه‌چی‌ ئێستا شه‌قام پانه‌و، پێوه‌ری‌ ئاخاوتنی‌ ئه‌وانیش، به‌ چه‌پ‌و راستدا ده‌یبڕێت.

به‌نده‌، ئه‌گه‌ر سه‌رۆكی‌ هه‌رێم سوربوایه‌ له‌سه‌ر راپرسی‌ ده‌ستورو هه‌ڵبژاردنه‌وه‌ی‌ سه‌رۆكی‌ هه‌رێم له‌ناو خه‌ڵكدا، به‌بێ‌ گێڕانه‌وه‌ی‌ ده‌ستور بۆ ناو په‌رله‌مان‌و سازانی‌ نیشتمانی‌، له‌ئان‌و كاتی‌ خۆیدا، له‌ناو حزبه‌كه‌ی‌ خۆم، هه‌موو هه‌وڵێكم ده‌دا، كه‌ سوربین له‌سه‌ر سازانی‌ نیشتمانی‌ بۆ ده‌ستورێكی‌ گه‌لپه‌سه‌ند. ئه‌گه‌ر حزبه‌كه‌شم، له‌به‌ر هه‌ر هۆیه‌كی‌ سیاسی‌، رێگای سازشی‌ له‌گه‌ڵ‌ پارتی‌ بگرتایه‌ته‌به‌ر، دژ ده‌بووم. له‌مباره‌وه‌، له‌كۆبونه‌وه‌كاندا هه‌ڤاڵانی‌ مه‌كته‌بی‌ سیاسی‌‌و سه‌ركردایه‌تی‌، ده‌زانن له‌و كه‌سانه‌ بووم، چه‌ندم خه‌بات بۆ سازان له‌سه‌ر ده‌ستور له‌ناو په‌رله‌ماندا، كردووه‌. به‌ڵكو له‌كۆبونه‌وه‌كان له‌گه‌ڵ‌ پارتیدا، سوورتریش بووم. به‌ڵام هه‌رگیز موزایه‌ده‌م به‌م هه‌ڵوێستانه‌مه‌وه‌ نه‌كردووه‌، ئه‌وه‌ی‌ له‌ ئه‌وه‌ڵیشه‌وه‌ له‌سه‌ر كێشه‌ی‌ هه‌ڵبژاردنی‌ سه‌رۆكی‌ هه‌رێم‌و سازانی‌ نیشتمانی‌ گوتومه‌، له‌به‌ر هیچ مه‌رامێك پاشگه‌ز نه‌بومه‌ته‌وه‌.

دوای‌ كێشمه‌كێشی چه‌ند مانگه‌، كه‌ مه‌سه‌له‌ی‌ سازان‌و هه‌مواركردن، له‌دوا بڕیاری‌ په‌رله‌مان‌و په‌یامی‌ سه‌رۆكی‌ هه‌رێمدا، كۆتایی‌ پێدێت، ئیتر هه‌ڵوێست فرۆشتن‌و كای‌ كۆن به‌باكردن، بێگومان بای‌ پێچه‌وانه‌ی‌ شه‌ن‌وكه‌و، كای‌ شه‌نكردنه‌كه‌ ده‌داته‌وه‌ به‌چاوی‌ ئه‌و شه‌نیارانه‌ی‌ شه‌ن نازانن.

لێره‌دا، دوور له‌ هه‌ڵڵاو بگره‌ی‌ ململانێ سیاسیه‌كان، ده‌مه‌وێ‌ له‌ په‌یامه‌كه‌ی‌ خودی‌ به‌رێز سه‌رۆكی‌ هه‌رێمه‌وه‌، خوێنه‌ر بخه‌مه‌ ناو به‌ڵگه‌ی‌ بڕیاره‌ گونجاوه‌كانی‌ په‌یامه‌كه‌، سه‌باره‌ت به‌ سازان‌و هه‌مواركردن، ئینجا چۆنیه‌تی‌ درێژكردنه‌وه‌ی‌ ماوه‌ی‌ سه‌رۆكی‌ هه‌رێم. مه‌به‌ستیشم ته‌نها خزمه‌تكردنی‌ راستیه‌كانه‌، ده‌نا، نه‌ سه‌رم له‌خۆم شێواندوه‌ بیر له‌وه‌ بكه‌مه‌وه‌ خۆم بۆ سه‌رۆكی‌ هه‌رێم كاندید بكه‌م، نه‌ له‌ناو ئۆپۆزسیۆنیشم، هه‌تا له‌سه‌ر سه‌رۆكی‌ هه‌رێم له‌سه‌ر كاندیدكردنی‌ سه‌رۆكی هه‌رێم رێكنه‌كه‌وتبین‌و لێم بووبێته‌ رق. زیاتر له‌وه‌ش، ته‌نانه‌ت بۆ سه‌رۆكی‌ لیستی‌ یه‌كێتیش بۆ په‌رله‌مانی‌ كوردستان، ئاماده‌ نه‌بووم له‌به‌رامبه‌ر هه‌ڤاڵ‌ ئه‌رسه‌لان بایزدا، پێداگیری‌ بكه‌م. ته‌نانه‌ت ئه‌ركم له‌ سه‌رۆكایه‌تی‌ لیژنه‌ی‌ باڵای‌ هه‌ڵبژاردنیش، دوای‌ بڕیاردان له‌سه‌ر كاندیده‌كانی‌ لیستی‌ یه‌كێتی‌، كۆتایی‌ هات.

په‌یامه‌كه‌ی‌ سه‌رۆكی‌ هه‌رێم، دوور له‌وه‌ی‌ یه‌كێتی‌ شانازی‌ به‌ سه‌ركه‌وتن بكات، یان پارتی‌ هه‌ست به‌ پاشه‌كشه‌ بكات، یان ئۆپۆزسیۆن چه‌ند هه‌ڵه‌ی‌ كردووه‌، له‌مباره‌وه‌، به‌ڵكو وه‌كو راستییه‌كی‌ مێژوویی، په‌یامه‌كه‌ هه‌ڵده‌سه‌نگێنم، هه‌تا بزانرێت ئۆپۆزسیۆن، له‌ناو چ بازنه‌یه‌كی‌ داخراوی‌ چۆنیه‌تی‌ كۆتایی پێهاتنی‌ ئه‌م پرسانه‌یه‌، بۆیه‌ ناتوانێت به‌رپرسانه‌ لێی بێته‌ده‌ر. بۆ ئه‌م مه‌به‌سته‌ چه‌ند ده‌قێكمان پێویسته‌ له‌ په‌یامه‌كه‌ی‌ سه‌رۆكی‌ هه‌رێم، لێكیانبده‌ینه‌وه‌. هیوادارین، ئه‌م وتاره‌ ببێته‌ مایه‌ی‌ دیالۆگێكی‌ ئارام له‌نێوان یه‌كێتی‌‌و پارتی‌‌و هێزه‌كانی‌ ئۆپۆزسیۆندا، ته‌نانه‌ت به‌نده‌ ئاماده‌م له‌گه‌ڵ‌ كه‌سایه‌تیه‌ یه‌كه‌مه‌كانی‌ ئۆپۆزسیۆن، به‌ئاماده‌بونی‌ هه‌موو كه‌ناڵه‌كانی‌ ته‌له‌فزیۆن، بكه‌ومه‌ مشتومڕ له‌سه‌ر ناوه‌رۆكی‌ په‌یامه‌كه‌ی‌ سه‌رۆكی‌ هه‌رێم. هه‌تا بیسه‌لمێنین ئاخۆ بۆچونی‌ كام لایه‌نمان راست ده‌رچوو؟
ئه‌و ده‌قانه‌ی‌ كه‌ لام گرنگه‌ به‌ئارامی‌ هه‌ڵوێسته‌یان له‌سه‌ر بكه‌م، (7) ده‌قن، كه‌ ده‌ق ده‌ق ئه‌مانه‌ی‌ خواره‌وه‌ن:

ده‌قی‌ یه‌كه‌م
"ئامانجی‌ من له‌ ناردنی‌ تێبینیی‌ لایه‌نه‌كان بۆ سه‌رۆكایه‌تیی‌ په‌رله‌مان بۆ ئه‌وه‌ بوو كه‌ ته‌وافوقی‌ لایه‌نه‌كانی‌ ناو په‌رله‌مان‌و ده‌ره‌وه‌ی‌ په‌رله‌مان‌و سه‌رنجی‌ هه‌موو پێكهاته‌كان ببێته‌ نه‌خشه‌رێگه‌یه‌كی‌ باشترو زه‌مینه‌یه‌كی‌ گونجاوتر دابین بكه‌ین بۆ پرۆژه‌ی‌ ده‌ستوورو هه‌ڵبژاردنه‌كان، ئینجا به‌هه‌موو سه‌راحه‌تێكه‌وه‌ به‌ گه‌لی‌ كوردستان رابگه‌یێنم كه‌ من وه‌ك شه‌خسی‌ خۆم هیچ نییه‌تێكم بۆ خۆكاندیدكردنه‌وه‌ نییه‌و رێز له‌ هه‌مو یاساكان ده‌گرم‌و ئه‌مانه‌تی‌ سه‌رۆكایه‌تی‌ هه‌رێمی‌ كوردستان راده‌ستی‌ هه‌ر به‌رێزێكی‌ دیكه‌ ده‌كه‌م كه‌ هه‌ڵده‌بژێردرێت."

ئه‌مه‌ یه‌كه‌م ده‌قه‌ له‌ په‌یامه‌كه‌ی‌ سه‌رۆكی‌ هه‌رێم، كه‌ من ده‌مه‌وێت سه‌رنجی‌ هه‌مو لایه‌كی‌ بۆ چه‌ند رسته‌یه‌كی‌ رابكێشم:

أ-ناردنی‌ تێبینیی‌ لایه‌نه‌كان بۆ سه‌رۆكایه‌تیی‌ په‌رله‌مان.
ب- ته‌وافوقی‌ لایه‌نه‌كانی‌ ناو په‌رله‌مان‌و ده‌ره‌وه‌ی‌ په‌رله‌مان‌و سه‌رنجی‌ هه‌موو پێكهاته‌كان.
ج- نه‌خشه‌رێگه‌یه‌كی‌ باشترو زه‌مینه‌یه‌كی‌ گونجاوتر دابین بكه‌ین بۆ پرۆژه‌ی‌ ده‌ستوورو هه‌ڵبژاردنه‌كان.
د- به‌هه‌موو سه‌راحه‌تێكه‌وه‌ به‌ گه‌لی‌ كوردستان رابگه‌یێنم كه‌ من وه‌ك شه‌خسی‌ خۆم هیچ نییه‌تێكم بۆ خۆكاندیدكردنه‌وه‌ نییه‌.ه- رێز له‌ هه‌مو یاساكان ده‌گرم‌و ئه‌مانه‌تی‌ سه‌رۆكایه‌تی‌ هه‌رێمی‌ كوردستان راده‌ستی‌ هه‌ر به‌رێزێكی‌ دیكه‌ ده‌كه‌م كه‌ هه‌ڵده‌بژێردرێت.

ده‌ی‌ من ئه‌م بڕگانه‌ ده‌خه‌مه‌ به‌ر ویژدانی‌ هه‌موو خوێنه‌رێكی‌ هۆشیار، سه‌باره‌ت به‌ هه‌مواركردنی‌ ده‌ستورو سازانی‌ نیشتمانیی‌، چ كه‌موكوڕییه‌كی‌ تێدایه‌؟ هه‌تا یه‌كێتی‌ ره‌خنه‌ی‌ لێبگرێت، یان ره‌خنه‌كانی‌ ئۆپۆزسیۆن‌و هه‌ندێك نوسه‌ر بسه‌لمێنێت؟

ده‌قی‌ دووه‌م
"دووباره‌ داوا له‌ هه‌موو لایه‌نه‌كان ده‌كه‌مه‌وه‌، له‌سه‌ر پرسی‌ ده‌ستوور به‌ره‌و ته‌وافوق هه‌نگاو بنێن‌و منیش به‌هه‌موو توانایه‌كه‌وه‌ پشتیوانیتان ده‌كه‌م، با قه‌یرانی‌ سیاسی‌ دروست نه‌بێ‌‌و بۆئه‌وه‌ی‌ ئارامیی‌ ژیان له‌ خه‌ڵكی‌ كوردستان تێكنه‌درێت‌و، هه‌موو هێزو توانای‌ خۆمان بخه‌ینه‌گه‌ڕ بۆئه‌وه‌ی‌ سوود له‌و ده‌رفه‌تانه‌ وه‌ربگرین كه‌ ئه‌مڕۆ بۆ گه‌ل‌و نیشتمانه‌كه‌مان له‌ناوچه‌كه‌دا هاتوونه‌ته‌پێش. هه‌موو هه‌وڵێكی‌ خۆم ده‌خه‌مه‌گه‌ڕ بۆ ره‌خساندنی‌ زه‌مینه‌یه‌كی‌ نوێی‌ گه‌یشتن به‌ ته‌وافوق. "

له‌م دووه‌مین ده‌قه‌شدا، دوور له‌ رق‌و به‌رژه‌وه‌ندبازی‌، دوور له‌ پروپاگه‌نده‌ی‌ هه‌ڵبژاردن‌و سه‌پاندنی‌ نه‌خشه‌ی‌ حزبایه‌تی‌، سه‌رنجی‌ هه‌مووان بۆ ئه‌م بڕگانه‌ راده‌كێشم:

أ- دووباره‌ داوا له‌ هه‌موو لایه‌نه‌كان ده‌كه‌مه‌وه‌، له‌سه‌ر پرسی‌ ده‌ستوور به‌ره‌و ته‌وافوق هه‌نگاو بنێن.
ب- منیش به‌هه‌موو توانایه‌كه‌وه‌ پشتیوانیتان ده‌كه‌م.
ج- با قه‌یرانی‌ سیاسی‌ دروست نه‌بێ‌‌و بۆئه‌وه‌ی‌ ئارامیی‌ ژیان له‌ خه‌ڵكی‌ كوردستان تێكنه‌درێت.
د- هه‌موو هێزو توانای‌ خۆمان بخه‌ینه‌گه‌ڕ بۆئه‌وه‌ی‌ سوود له‌و ده‌رفه‌تانه‌ وه‌ربگرین كه‌ ئه‌مڕۆ بۆ گه‌ل‌و نیشتمانه‌كه‌مان له‌ناوچه‌كه‌دا هاتوونه‌ته‌پێش.

هـ- هه‌موو هه‌وڵێكی‌ خۆم ده‌خه‌مه‌گه‌ڕ بۆ ره‌خساندنی‌ زه‌مینه‌یه‌كی‌ نوێی‌ گه‌یشتن به‌ ته‌وافوق.

چاكه‌.. له‌سه‌ر ئه‌م بڕگانه‌، جگه‌ له‌وه‌ی‌ كه‌ ده‌بێت یه‌كێتی‌ په‌سه‌ندی‌ بكات، چی‌ تری‌ بكردایه‌؟ ئاخۆ ده‌بوو كامیان بگۆڕێت؟ یان چۆنیان ده‌ستكاری‌ بكات؟ یان چییان بسڕێته‌وه‌؟ وه‌ڵامه‌كه‌ی‌ بۆ گفتوگۆیه‌كی‌ ئه‌قڵانی‌‌و بابه‌تی‌، جێدێڵم.

ده‌قی‌ سێهه‌م
"یاسای‌ درێژكردنه‌وه‌ی‌ ماوه‌ی‌ په‌رله‌مانی‌ كوردستانم ئیمزاكرد تاوه‌كو هیچ بۆشاییه‌كی‌ یاسایی‌‌و ده‌ستووری‌ له‌ هه‌رێمی‌ كوردستاندا دروست نه‌بێت."
دروستبونی‌ بۆشایی‌ یاسایی‌، ئۆباڵه‌كه‌ی‌ له‌سه‌ر ئۆپۆزسیۆنه‌. بۆ؟ چونكه‌، له‌ دوا دوو كۆبونه‌وه‌ پێنجقۆڵیه‌كه‌ی‌ ئۆپۆزسیۆن‌و یه‌كێتی‌‌و پارتی‌، نوێنه‌رانی‌ یه‌كێتی‌‌و پارتی‌، له‌سه‌ر هه‌مواركردنه‌وه‌ی‌ ده‌ستورو گێڕانه‌وه‌ی‌ بۆ ناو په‌رله‌مان، رازی‌ بووین، هه‌ر ئه‌و رۆژه‌ (له‌ پارتی‌: مه‌حمود ئه‌حمه‌د، جه‌عفه‌ر ئیبراهیم. یه‌كێتی‌: سه‌عدی‌ ئه‌حمه‌د پیره‌و مه‌لا به‌ختیار) چوینه‌ لای‌ به‌رێز سه‌رۆكی‌ هه‌رێم، باسی‌ گرنگی‌ ره‌زامه‌ندی‌ خۆمانمان له‌سه‌ر هه‌مواركردنی‌ ده‌ستور بۆ كرد، دوای‌ گفتوگۆیه‌كی‌ ئارام، وتی‌: ده‌بێت له‌رێگه‌ی‌ په‌رله‌مانه‌وه‌، چوارچێوه‌ی‌ یاسایی‌ بۆ بدۆزرێته‌وه‌. هه‌ر ئه‌و رۆژه‌ به‌ ته‌له‌فۆن ئۆپۆزسیۆنمان ئاگادار كرده‌وه‌. دوای‌ ئه‌م كۆبونه‌وه‌یه‌، به‌رێز نێچیروان بارزانی‌، هه‌م له‌ كۆبونه‌وه‌ی‌ هێزه‌ سیاسیه‌كان له‌ناو په‌رله‌ماندا بۆ دروستكردنی‌ لیژنه‌ی‌ گفتوگۆ له‌گه‌ڵ‌ به‌غداد، هه‌م دوو جار له‌ كۆنگره‌ی‌ رۆژنامه‌نوسیدا به‌ناوی‌ پارتیه‌وه‌، گوتی‌: ئێمه‌ وه‌كو پارتی‌ هێڵی‌ سورمان بۆ هه‌مواركردنه‌وه‌ی‌ ده‌ستوور نییه‌.

ئه‌م بڕیارانه‌، پاساوی‌ ئۆپۆزسیۆنی لاواز كردو خستنیه‌ دۆخێكی‌ چاوه‌ڕواننه‌كراوه‌وه‌، بۆیه‌ هه‌ڵمه‌تی‌ راگه‌یاندنیان، به‌بیانوی‌ جۆراوجۆر فراوان كردو، كۆبونه‌وه‌كانیشیان هه‌تا سه‌روبه‌ندی‌ كۆتاییهاتنی‌ ماوه‌ی‌ په‌رله‌مان، په‌كخست.

كه‌وابێ‌، یه‌كێتی‌‌و پارتی‌‌و هه‌موو ئه‌و لایه‌نانه‌ی‌، لایان مه‌به‌سته‌ دۆخه‌كه‌ له‌ گێرژنه‌ ده‌رنه‌چێت‌و بۆشایی یاسایی‌ روبه‌ڕوی‌ ئه‌زمونه‌كه‌مان نه‌بێته‌وه‌، چاره‌یه‌ك نه‌ما جگه‌ له‌ درێژكردنه‌وه‌ی‌ ماوه‌ی‌ په‌رله‌مان نه‌بێت. ده‌شبو درێژ بكرێته‌وه‌. چونكه‌ درێژنه‌كردنه‌وه‌ی‌، لێكه‌وته‌ی‌ مه‌ترسیداری‌ چاوه‌ڕوانكراو و نه‌كراوی‌ لێده‌كه‌وته‌وه‌. دڵنیام هه‌بوون‌و هه‌ن، دروستكردنی‌ بۆشایی‌ یاسایی‌‌و سه‌رهه‌ڵدانی‌ ئه‌و مه‌ترسیانه‌یان پێ باش بوو.

ده‌قی‌ چواره‌م
"ماوه‌و ویلایه‌تی‌ سه‌رۆكایه‌تی‌ هه‌رێمی‌ كوردستان له‌لایه‌ن په‌رله‌مانی‌ كوردستانه‌وه‌ به‌ده‌نگی‌ فراكسیۆنی‌ كوردستانیی‌ (پارتی‌‌و یه‌كێتی‌) له‌گه‌ڵ‌ فراكسیۆنه‌كانی‌ حیزب‌و نه‌ته‌وه‌كانی‌ دیكه‌ی‌ ناو په‌رله‌مان‌و سه‌ربه‌خۆكان جگه‌ له‌ فراكسیۆنه‌كانی‌ حیزبه‌كانی‌ ئۆپۆزسیۆن، درێژكرایه‌وه‌.
ئێستا من له‌به‌رده‌م ئه‌ركه‌كانی‌ ئه‌و هاوپه‌یمانێتییه‌ته‌دام كه‌ له‌نێوان پارتی‌ دیموكراتی‌ كوردستان‌و یه‌كێتی‌ نیشتمانی‌ كوردستاندا هه‌یه‌، كه‌ پێكه‌وه‌ له‌گه‌ڵ‌ چه‌ند حیزب‌و نه‌ته‌وه‌ی‌ كوردستاندا له‌ناو پارله‌مان بڕیاریان داوه‌ ماوه‌ی‌ سه‌رۆكایه‌تی‌ هه‌رێمی‌ كوردستان بۆ دوو ساڵ‌ درێژ بكرێته‌وه‌، به‌بێ‌ ئه‌وه‌ی‌ من تێیدا به‌شدرا بووبم."

أ‌- ماوه‌و ویلایه‌تی‌ سه‌رۆكایه‌تی‌ هه‌رێمی‌ كوردستان له‌لایه‌ن په‌رله‌مانی‌ كوردستانه‌وه‌ به‌ده‌نگی‌ فراكسیۆنی‌ كوردستانیی‌ (پارتی‌‌و یه‌كێتی‌) له‌گه‌ڵ‌ فراكسیۆنه‌كانی‌ حیزب‌و نه‌ته‌وه‌كانی‌ دیكه‌ی‌ ناو په‌رله‌مان‌و سه‌ربه‌خۆكان، درێژكرایه‌وه‌.
ب‌- ئێستا من له‌به‌رده‌م ئه‌ركه‌كانی‌ ئه‌و هاوپه‌یمانێتییه‌ته‌دام كه‌ له‌نێوان پارتی‌ دیموكراتی‌ كوردستان‌و یه‌كێتی‌ نیشتمانی‌ كوردستاندا هه‌یه‌.
ج- پێكه‌وه‌ له‌گه‌ڵ‌ چه‌ند حیزب‌و نه‌ته‌وه‌ی‌ كوردستاندا له‌ناو پارله‌مان بڕیاریان داوه‌ ماوه‌ی‌ سه‌رۆكایه‌تی‌ هه‌رێمی‌ كوردستان بۆ دوو ساڵ‌ درێژ بكرێته‌وه‌.
د- به‌بێ‌ ئه‌وه‌ی‌ من تێیدا به‌شدر بووبم.

لێره‌دا بۆ مێژوو ده‌ڵێم: ئه‌م قسانه‌، چۆن نوسراون، راستییه‌ مێژووییه‌كانن. له‌به‌رده‌م یه‌كێتی‌‌و پارتی‌‌و ئه‌و لایه‌نانه‌ی‌ ئه‌م بڕگانه‌ی‌ سه‌ره‌وه‌یان په‌سه‌ند كرد، ئۆپۆزسیۆن رێگایه‌كی‌ تری‌ نه‌هێشته‌وه‌. پێش په‌سه‌ندكردنی‌ ئه‌م بڕیارانه‌ش، یه‌كێتی‌‌و پارتی‌، به‌ نوێنه‌رایه‌تی‌ (فازیل میرانی‌‌و مه‌لا به‌ختیار) سه‌ردانی‌ هه‌موو هێزه‌كانی‌ ئۆپۆزسیۆنمان كرد، بۆئه‌وه‌ی‌ هه‌م له‌سه‌ر هه‌مواركردنی‌ ده‌ستور له‌ناو په‌رله‌ماندا، هه‌م له‌سه‌ر چۆنیه‌تی‌ چاره‌سه‌ركردنی‌ ماوه‌ی‌ سه‌رۆكایه‌تی‌ هه‌رێم، پێكه‌وه‌ له‌سه‌ر هه‌موو شته‌كان رێكه‌وین. به‌داخه‌وه‌ نه‌ك نه‌یانكرد، به‌ڵكو هه‌تا دوا چركه‌ساتی‌ په‌سه‌ندكردنی‌ بڕیاری‌ درێژكردنه‌وه‌ی‌ په‌رله‌مان‌و ماوه‌ی‌ سه‌رۆكایه‌تی‌ هه‌رێم، هێزه‌كانی‌ ئۆپۆزسیۆن له‌سه‌ر هیچ كه‌سایه‌تیه‌كی‌ ناوخۆشیان بۆ كاندیدی‌ سه‌رۆكایه‌تی‌ هه‌رێم رێكنه‌كه‌وتن. ته‌نانه‌ت بۆ دیاریكردنی‌ سه‌رۆكی‌ لیستی‌ كاندیده‌كانی‌ په‌رله‌مانیشیان كێشه‌یان كه‌م نه‌بوو.

ده‌قی‌ پێنجه‌م
"بۆ ره‌چاوكردنی‌ نیگه‌رانییه‌كانی‌ پێكهاته‌ نه‌ته‌وه‌یی‌‌و ئاینییه‌كانی‌ كوردستان له‌مه‌ڕ ئه‌گه‌ری‌ قوڵتربوونی‌ قه‌یرانی‌ سیاسی‌‌و پاراستنی‌ سه‌قامگیری‌ له‌كوردستانداو، له‌به‌رده‌م داوای‌ كه‌سایه‌تییه‌ خه‌باتگێڕه‌كانی‌ كوردستانی‌ عێراق‌و پارچه‌كانی‌ دیكه‌ی‌ كوردستاندا، و پاش راوێژكردن له‌گه‌ڵ‌ زۆربه‌ی‌ هێزو لایه‌نه‌ سیاسییه‌كانی‌ كوردستان یاسای‌ درێژكردنه‌وه‌ی‌ ماوه‌ی‌ سه‌رۆكایه‌تی‌ هه‌رێمی‌ كوردستانم ره‌تنه‌كرده‌وه‌. به‌ڵام ئه‌و ره‌تنه‌كردنه‌وه‌یه‌ش به‌و مانایه‌ نییه‌ كه‌ من له‌گه‌ڵ‌ شێوازو ناوه‌رۆكی‌ یاسای‌ درێژكردنه‌وه‌ی‌ ویلایه‌تی‌ سه‌رۆكی‌ هه‌رێمدا بم، بۆیه‌ش ئیمزام نه‌كرد."

با له‌م ده‌قه‌شدا، دیقه‌ت له‌م رستانه‌ بده‌ینه‌وه‌و بزانین ئاخۆ، له‌كوێدا هه‌ڵه‌ كراوه‌:

أ‌- بۆ ره‌چاوكردنی‌ نیگه‌رانییه‌كانی‌ پێكهاته‌ نه‌ته‌وه‌یی‌‌و ئاینییه‌كانی‌ كوردستان له‌مه‌ڕ ئه‌گه‌ری‌ قوڵتربوونی‌ قه‌یرانی‌ سیاسی‌‌و پاراستنی‌ سه‌قامگیری‌ له‌كوردستاندا.
ب‌- له‌به‌رده‌م داوای‌ كه‌سایه‌تییه‌ خه‌باتگێڕه‌كانی‌ كوردستانی‌ عێراق‌و پارچه‌كانی‌ دیكه‌ی‌ كوردستاندا.
ج- پاش راوێژكردن له‌گه‌ڵ‌ زۆربه‌ی‌ هێزو لایه‌نه‌ سیاسییه‌كانی‌ كوردستان یاسای‌ درێژكردنه‌وه‌ی‌ ماوه‌ی‌ سه‌رۆكایه‌تی‌ هه‌رێمی‌ كوردستانم ره‌تنه‌كرده‌وه‌.
د- ئه‌و ره‌تنه‌كردنه‌وه‌یه‌ش به‌و مانایه‌ نییه‌ كه‌ من له‌گه‌ڵ‌ شێوازو ناوه‌رۆكی‌ یاسای‌ درێژكردنه‌وه‌ی‌ ویلایه‌تی‌ سه‌رۆكی‌ هه‌رێمدا بم، بۆیه‌ش ئیمزام نه‌كرد.

بڕگه‌ به‌ بڕگه‌ی‌ ئه‌م بڕگانه‌ش، تاوتوێ بكرێن، كه‌سێك‌و لایه‌ك، لایه‌نی‌ كه‌می‌ هه‌ستی‌ به‌رپرسیارێتی‌ نه‌ته‌وه‌یی‌، نیشتمانیی‌، كۆمه‌ڵایه‌تی‌، یاسایی‌‌و روناكبیری‌ هه‌بێت، ناتوانێت ره‌تیان بكاته‌وه‌. مه‌گه‌ر ته‌نها شه‌ڕپێفرۆشتن نه‌بێت.
چه‌ند جارێك، له‌سه‌ر په‌سه‌ندكردن‌و نه‌كردنی‌ بڕیارو یاساكانی‌ په‌رله‌مان، له‌گه‌ڵ‌ سه‌رۆكی‌ هه‌رێم دانیشتین، له‌ناخه‌وه‌ هه‌ستمانكرد، له‌به‌رده‌م چ دووڕیانێكی‌ مێژووییدایه‌. له‌دوائه‌نجامدا به‌مشێوه‌یه‌ یاساكه‌ی‌ په‌سه‌ند كرد، كه‌ ره‌تینه‌كاته‌وه‌. به‌نیسبه‌ت یه‌كێتیه‌وه‌، چۆن ئۆباڵمان بوو بڕیاری‌ به‌رنامه‌ی‌ سازانی‌ نیشتمانی‌، به‌ئه‌قڵانیه‌تێكی‌ سیاسی‌‌و لۆژیكی‌ دۆستایه‌تی‌ ببه‌ینه‌سه‌رو نه‌چینه‌ ژێر باری‌ راپرسی‌ ده‌ستووری‌ به‌بێ‌ سازانی‌ نیشتمانی‌. هه‌ڵبه‌ته‌ به‌ڕێز سه‌رۆكی‌ هه‌رێمیش، مافی‌ خۆی‌ بوو، بیر له‌ جۆره‌ چاره‌سه‌رێك بكاته‌وه‌، بگونجێت له‌گه‌ڵ‌ سه‌نگی‌ كه‌سایه‌تی‌ سه‌رۆكی‌ هه‌رێم‌و هه‌موو جه‌مسه‌ره‌كانی‌ كێشه‌كه‌. وایشی‌ كرد.

ده‌قی‌ شه‌شه‌م
" به‌شێوه‌یه‌كی‌ كاتی‌ تاوه‌كو خولی‌ چواره‌می‌ په‌رله‌مانی‌ كوردستان ده‌ست به‌كار ده‌بێت‌و به‌په‌له‌ ده‌گه‌نه‌ ته‌وافوقێك، ئه‌و ئه‌رك‌و ئه‌مانه‌ته‌ی‌ كه‌ خراوه‌ته‌ سه‌رشانم به‌جێیده‌گه‌ێینم، هه‌ر له‌ئێستاشه‌وه‌ داوا له‌ سه‌رۆكایه‌تیی‌ خولی‌ داهاتووی‌ په‌رله‌مانی‌ كوردستان ده‌كه‌م كه‌ له‌ژێر رۆشنایی‌ ئه‌و نامه‌یه‌م كه‌ له‌ 12 ی‌ 6 ی‌ 2013 دا ئاڕاسته‌ی‌ سه‌رۆكایه‌تیی‌ خولی‌ ئێستای‌ په‌رله‌مانم كردبوو، دوای‌ هه‌ڵبژاردنه‌كانی‌ 21/9/2013 ده‌ستبه‌جێ‌ له‌كۆبوونه‌وه‌ ده‌ستپێكییه‌كانی‌ سه‌رۆكایه‌تی‌ په‌رله‌ماندا به‌زووترین كات میكانیزمێك بدۆزنه‌وه‌ بۆئه‌وه‌ی‌ له‌ماوه‌ی‌ كه‌متر له‌ ساڵێكدا بگه‌نه‌ ته‌وافوق له‌سه‌ر هه‌مواركردنی‌ پرۆژه‌ی‌ ده‌ستوورو ئالییه‌تی‌ هه‌ڵبژاردنی‌ سه‌رۆكی‌ هه‌رێم. ئه‌وكات هه‌ڵبژاردنی‌ سه‌رۆكێكی‌ نوێی‌ هه‌رێمی‌ كوردستان ئه‌نجام بدرێت‌و ئه‌و ئه‌مانه‌ته‌ی‌ له‌ده‌ست ئێمه‌دایه‌ بده‌ینه‌ هه‌ر به‌ڕێزێكی‌ دیكه‌ كه‌ متمانه‌ی‌ گه‌لی‌ كوردستان به‌ده‌ست ده‌هێنێت."

له‌م په‌ره‌گرافه‌دا، بڕگه‌كان به‌رجه‌سته‌تر ده‌بن‌و جوانتر خۆیان به‌ده‌سته‌وه‌ ده‌ده‌ن‌و پروپاگه‌نده‌كان ره‌تده‌كه‌نه‌وه‌، وه‌كو:

أ‌- به‌شێوه‌یه‌كی‌ كاتی‌ تاوه‌كو خولی‌ چواره‌می‌ په‌رله‌مانی‌ كوردستان ده‌ست به‌كار ده‌بێت‌و به‌په‌له‌ ده‌گه‌نه‌ ته‌وافوقێك، ئه‌و ئه‌رك‌و ئه‌مانه‌ته‌ی‌ كه‌ خراوه‌ته‌ سه‌رشانم به‌جێیده‌گه‌ێینم.
ب‌- له‌ژێر رۆشنایی‌ ئه‌و نامه‌یه‌م كه‌ له‌ 12 ی‌ 6 ی‌ 2013 دا ئاڕاسته‌ی‌ سه‌رۆكایه‌تیی‌ خولی‌ ئێستای‌ په‌رله‌مانم كردبوو، دوای‌ هه‌ڵبژاردنه‌كانی‌ 21/9/2013 ده‌ستبه‌جێ‌ له‌كۆبوونه‌وه‌ ده‌ستپێكییه‌كانی‌ سه‌رۆكایه‌تی‌ په‌رله‌ماندا به‌زووترین كات میكانیزمێك بدۆزنه‌وه‌ بۆئه‌وه‌ی‌ له‌ماوه‌ی‌ كه‌متر له‌ ساڵێكدا بگه‌نه‌ ته‌وافوق له‌سه‌ر هه‌مواركردنی‌ پرۆژه‌ی‌ ده‌ستوورو ئالییه‌تی‌ هه‌ڵبژاردنی‌ سه‌رۆكی‌ هه‌رێم.
ج- ئه‌وكات هه‌ڵبژاردنی‌ سه‌رۆكێكی‌ نوێی‌ هه‌رێمی‌ كوردستان ئه‌نجام بدرێت‌و ئه‌و ئه‌مانه‌ته‌ی‌ له‌ده‌ست ئێمه‌دایه‌ بده‌ینه‌ هه‌ر به‌ڕێزێكی‌ دیكه‌ كه‌ متمانه‌ی‌ گه‌لی‌ كوردستان به‌ده‌ست ده‌هێنێت.

ئه‌م بڕگانه‌ی‌ ده‌قی‌ شه‌شه‌م، بێ ته‌مومژ، به‌رپرسیارێتی‌ بڕیاری‌ سه‌رۆكایه‌تی‌ كاتی‌ ده‌گرێته‌ ئه‌ستۆ. داواش ده‌كات به‌زووترین كات خولی‌ چواره‌می‌ په‌رله‌مان، میكانیزمێك بدۆزێته‌وه‌، بۆ هه‌مواركردنی‌ پرۆژه‌ی‌ ده‌ستورو ئالیه‌تی‌ هه‌ڵبژاردنی‌ سه‌رۆكی‌ هه‌رێم. ئه‌مه‌ چ ده‌گه‌یه‌نێت؟

كوت‌و مت، ئه‌وه‌ ده‌گه‌یه‌نێت:

-سه‌رۆكی‌ هه‌رێم دوو ساڵه‌كه‌یشی‌ پێ‌ زۆر بووه‌.
-خولی‌ چواره‌می‌ په‌رله‌مان راسته‌وخۆ خراوه‌ته‌ به‌رده‌م ئه‌ركی‌ هه‌مواركردنی‌ ده‌ستورو ئالیه‌تی‌ هه‌ڵبژاردنی‌ سه‌رۆكی‌ هه‌رێم.
- بڕیاره‌كانیش به‌ ته‌وافوق (واتا سازانی‌ نیشتمانیی‌) بدرێت.

له‌ كام رسته‌دا، له‌ كام بڕگه‌دا، له‌كوێی‌ ئه‌م ده‌قه‌دا، راسته‌وخۆ یان ناڕاسته‌وخۆ، به‌رێز سه‌رۆكی‌ هه‌رێم، قسه‌ی‌ له‌سه‌ر ئه‌وه‌ كردووه‌ كه‌ ده‌ستور نابێت بگه‌ڕێته‌وه‌ بۆ په‌رله‌مان؟ یان وتبێتی‌ له‌ناو په‌رله‌ماندا هه‌موار نه‌كرێته‌وه‌؟ یان سه‌پاندبێتی‌ پێش هه‌مواركردنی‌ ده‌ستوور له‌ناو په‌رله‌ماندا، ده‌ستور بخرێته‌ راپرسیه‌وه‌؟ هیچی‌ ئه‌وانه‌ی‌ نه‌وتووه‌. رون‌و ئاشكرا، جه‌ختی‌ كردۆته‌وه‌، كه‌ له‌ماوه‌ی‌ كه‌متر له‌ ساڵێكدا (نه‌ك ساڵه‌هاش) میكانیزمێك بدۆزرێته‌وه‌ بۆئه‌وه‌ی‌ بگه‌ینه‌ ته‌وافوق (نه‌ك پێشتر ده‌ستور بخرێته‌ راپرسی‌) له‌سه‌ر هه‌مواركردنی‌ پرۆژه‌ی‌ ده‌ستوور. هه‌روه‌ها، بۆ ئالیه‌تی‌ هه‌ڵبژاردنی‌ سه‌رۆكی‌ هه‌رێمیش. كه‌وابێ‌: سه‌رۆكی‌ هه‌رێم بڕیاری‌ نه‌داوه‌، سه‌رۆك، به‌ راپرسی‌ له‌ناو خه‌ڵكدا هه‌ڵبژێردرێت، به‌ڵكو لێیگه‌ڕاوه‌ به‌ سازان له‌ناو په‌رله‌ماندا ئالیه‌تی‌ چۆنیه‌تی‌ هه‌ڵبژاردنه‌وه‌ی‌ سه‌رۆك په‌سه‌ند بكرێت.

ده‌قی‌ حه‌وته‌م
" ده‌بێ‌ به‌هه‌موومان نموونه‌یه‌كی‌ جوانی‌ دیموكراسی‌ پێشكه‌ش بكه‌ین، نابێت هیچ كه‌س به‌ كورسییه‌كه‌یه‌وه‌ بچه‌سپێت‌و، نابێت رێگه‌ بدرێت سه‌رۆكی‌ هه‌تا هه‌تایی‌ هه‌بێت له‌كوردستاندا. من خۆم باوه‌ڕێكی‌ ته‌واوم به‌وه‌ هه‌یه‌ كه‌ كاتێك پۆستێك له‌لایه‌ن كه‌سێكه‌وه‌ به‌جێده‌هێڵدرێت، ده‌بێ‌ گه‌ل ئه‌و پرسیاره‌ بكات كه‌ بۆچی‌ ئه‌و پۆسته‌ به‌جێده‌هێڵێت، نه‌ك گه‌ل بگاته‌ راده‌ی‌ ئه‌وه‌ی‌ ئه‌و پرسیاره‌ بكات كه‌ بۆچی‌ ناڕوات."

به‌ش به‌حاڵی‌ خۆم، ئه‌م په‌ره‌گرافه‌م، دایه‌ به‌ر ئه‌ندێشه‌م، هه‌رچه‌ند كردم‌و كۆشام، نه‌ هه‌ڵه‌یه‌كی‌ سیاسی‌، نه‌ ته‌كتیكێك، نه‌ پێچه‌وانه‌ی‌ پرنسیپی‌ دیموكراسیشم، له‌م ده‌قه‌دا هه‌ست پێكرد. پێشموایه‌ دوای‌ خولی‌ چواره‌می‌ په‌رله‌مان، ئه‌وكاته‌ی‌ میكانیزم‌و ئالیه‌تی‌ سازان له‌سه‌ر ده‌ستورو هه‌ڵبژاردنه‌وه‌ی‌ سه‌رۆكی‌ هه‌رێم ده‌ستنیشان ده‌كرێت، هه‌نگینێ‌، كه‌ بارزانی‌ پابه‌ندی‌ ئه‌م ده‌قه‌ ده‌بێت، پێموایه‌ بارته‌قای‌ ته‌واوی‌ ته‌مه‌نی‌ سیاسی‌ خۆی‌، خزمه‌تی‌ پرۆسه‌ی‌ ده‌ستاوده‌ستكردنی‌ ده‌سه‌ڵات ده‌كات. ئه‌مه‌ش خاڵێكی‌ گرنگ ده‌بێت له‌مێژووی بارزانیدا. هه‌روه‌ها له‌مێژووی‌ سیاسی‌ گه‌له‌كه‌شماندا. به‌پێچه‌وانه‌شه‌وه‌، ئه‌نجامه‌كه‌ی‌ به‌خراپی‌ ده‌شكێته‌وه‌.

له‌كۆتاییشدا ده‌مه‌وێت سه‌رنجی‌ هه‌موو كه‌سێك، بۆ هه‌ندێك راستی‌ تری‌ په‌یامه‌كه‌ی‌ سه‌رۆكی‌ هه‌رێم رابكێشم، كه‌ به‌داخه‌وه‌، هێزه‌كانی‌ ئۆپۆزسیۆن، له‌به‌ر په‌یڕه‌وكردنی‌ سیاسه‌تی‌ كارو كاردانه‌وه‌، ته‌نانه‌ت دیقه‌تێكی‌ قوڵیشیان له‌ ناوه‌رۆكی‌ په‌یامه‌كه‌ نه‌داوه‌. یاخود جگه‌ له‌ پروپاگه‌نده‌ی‌ هه‌ڵبژاردن، له‌سه‌ره‌تاوه‌ تا ئێستا، هیچی‌ تریان لا مه‌به‌ست نه‌بووه‌. ئه‌گینا نه‌ده‌بوو، ئه‌م ده‌سته‌واژانه‌یان به‌سه‌ردا تێبپه‌ڕێت‌و سه‌ره‌نجام، به‌ئاره‌زوی‌ خۆیان، په‌یامه‌كه‌ بپێون.

بۆ نمونه‌:
له‌ سه‌راپای‌ په‌یامه‌كه‌، به‌ڕێز سه‌رۆكی‌ هه‌رێم ته‌نانه‌ت بۆ یه‌ك جاریش، جه‌ختی‌ نه‌كردوه‌ له‌سه‌ر ئه‌وه‌ی‌ ده‌بێت ده‌ستور بخرێته‌ راپرسیه‌وه‌، ئینجا هه‌موار بكرێته‌وه‌. واتا: به‌ته‌واوه‌تی‌ گه‌وهه‌ری‌ په‌یامه‌كه‌ له‌گه‌ڵ‌ گۆڕانكاریه‌كانی‌ هه‌لومه‌رجه‌كه‌ گونجێنراوه‌.

بۆ باشتر تێگه‌یشتن له‌و راستیه‌ی‌ سه‌ره‌وه‌، له‌ دوتوێی‌ په‌یامه‌كه‌دا، سه‌رۆكی‌ هه‌رێم، (11) دانه‌ جار باسی‌ ته‌وافوق (سازان) ی‌ له‌نێوان هه‌موو لایه‌نه‌كاندا، كردووه‌. هه‌موویشی‌ به‌ستۆته‌وه‌ به‌ سه‌رجه‌م لایه‌نه‌ سیاسیه‌كان‌و پاشان بڕیاری‌ په‌رله‌مان له‌ خولی‌ چواره‌مدا. به‌بێ ئه‌وه‌ی‌ بۆ یه‌ك جاریش، له‌ هیچ بڕگه‌یه‌كی‌ په‌یامه‌كه‌دا، گومان بخاته‌ سه‌ر بڕیاری‌ سازانی‌ نیشتمانیی‌ له‌ناو په‌رله‌ماندا. هه‌روه‌ها له‌ ناواخنی‌ په‌یامه‌كه‌دا (9) جار ئاماژه‌ی‌ به‌ دیموكراسی‌‌و بڕیاری‌ دیموكراسیانه‌و (4) جاریش باسی‌ ئازادی‌ كردووه‌.

به‌ش به‌ حاڵی‌ به‌نده‌، ئێستا كه‌ ئه‌م په‌یامه‌م لێكداوه‌ته‌وه‌، بۆ ئه‌م هه‌لومه‌رجه‌، به‌ویژدانێكی‌ ئاسوده‌وه‌، روده‌كه‌مه‌وه‌ گه‌له‌كه‌م‌و ده‌ڵێم: ئه‌گه‌ر یه‌كێتی‌‌و پارتی‌‌و هه‌موو ئه‌و لایه‌نه‌ تێكۆشه‌رانه‌ی‌ ئه‌م بڕیارو یاسایانه‌ی‌ په‌رله‌مانیان له‌م هه‌لومه‌رجه‌ هه‌ستیاره‌ی‌ كوردستان په‌سه‌ند كرد، ئه‌گه‌ر بتوانن ناواخنی‌ ئه‌م په‌یامه‌و یاسای‌ په‌رله‌مان له‌ناو په‌رله‌ماندا بگه‌یه‌ننه‌ هه‌مواركردنی‌ ده‌ستورو چۆنیه‌تی‌ هه‌ڵبژاردنی‌ سه‌رۆكی‌ هه‌رێم، له‌سه‌ره‌تای‌ خولی‌ چواره‌می‌ په‌رله‌ماندا، له‌وباوه‌ڕه‌دام گه‌لی‌ كوردستان، پرۆسه‌ی‌ نوسینی‌ ده‌ستورێكی‌ گه‌لپه‌سه‌ند، ده‌گه‌یه‌نێته‌ راده‌ی‌ جێبه‌جێكردنی‌ ئه‌ركه‌ مێژووییه‌كان له‌ رۆژهه‌ڵاتی‌ ناوه‌ڕاستدا. به‌مه‌ش نه‌ك هه‌ر باشوری‌ كوردستان، به‌ڵكو ته‌واوی‌ نه‌ته‌وه‌ی‌ كوردو هێزه‌ دیموكراته‌كانی‌ ده‌وروبه‌رمان، شانازییه‌كی‌ دیموكراسی‌ ده‌گمه‌ن تۆمار ده‌كه‌ن. نه‌ك وه‌كو میسر و ئیخوانه‌كان، به‌ سه‌پاندنی‌ ده‌ستوور له‌لایه‌ن سه‌رۆكی‌ وڵاته‌كه‌وه‌، گه‌لانی‌ میسریان دوچاری‌ گێژاوی قه‌یرانێكی‌ ئه‌وتۆ كردووه‌، به‌داخه‌وه‌، سه‌ره‌نجامی‌ ترسناكی‌ لێ چاوه‌ڕوان ده‌كرێت.

 

 

Copyright © 2012. all rights reserved . Developed by Avesta Group and powered by Microsoft Azure