هەواڵ

-

ئۆجه‌لان‌و ئه‌ردۆغان؛ دوو هه‌ڵوێست‌و یه‌ك ئارمانج ‌

دڵشا یوسف‌
1/17/2014 10:20:35 AM 636 ‌جار خوێندراوه‌ته‌وه

شتی هه‌ڤدیتنا دووماهیێ یا په‌رله‌مه‌نته‌رێن پارتیا ئاشتی‌و دیمۆكارتیك د گه‌ل سه‌رۆكی PKK عه‌بدوللا ئۆجه‌لان ل زندانا ئیمرالی، هێشتا باشتر هه‌لوێست‌و نه‌رینا PKKو ئۆجه‌لان ئه‌شكرا بوو، به‌رامبه‌ر پلانا 17 كانوونا یه‌كه‌م كو ژ لایێ ته‌ڤگه‌را فه‌تحووللا گوله‌ن ڤه‌ هاتبوو رێخستن‌و وه‌ك كۆده‌تاییه‌كێ ل دژی حكومه‌تا سه‌رۆك وه‌زیر ره‌جه‌ب ته‌یب ئه‌ردۆگان هاته‌ بناڤكرن. به‌لێ مه‌سه‌لا كۆ هێشتا جهی گومان‌و شیرۆڤه‌كرنێ یه‌، هه‌لوێستێ سه‌رۆك وه‌زیر ره‌جه‌ب ته‌یب ئه‌ردۆغانه‌، كو وێ پشتی ڤێ كۆده‌تایێ چاوا بته‌ڤگه‌ره‌ به‌رامبه‌ر دۆزا كورد‌و قۆناغا جاره‌سه‌ریێ كو ئه‌و ب خوه‌ یه‌ك ژ بنیادنه‌رێن وێ یێن سه‌ره‌كه‌ یه‌.
یا راست، هه‌لوێستی PKK و ئۆجه‌لان ژ رۆژا رۆژ ده‌ ئه‌شكه‌را‌و زه‌لال بوو به‌رامبه‌ر ده‌وله‌تا په‌ره‌لێل‌و ته‌ڤگه‌را فه‌تحووللا گوله‌ن‌و هه‌میشه‌ هوشیاری دانه‌ ده‌وله‌تێ ژ مه‌ترسییا ڤێ ته‌ڤگه‌رێ یا ل سه‌ر پاشه‌رۆژا سیاسی ل توركیا.

هه‌لوێستێ PKK و ئۆجه‌لان به‌رامبه‌ر ده‌وله‌تا په‌ره‌لێل
ئه‌م دشێن هه‌لوێستا PKK یا راست و رۆن د ڤێ ده‌ربارێ ده‌، هێشتا باشتر د ئاخافتنه‌كه‌ لیده‌رێ PKK موراد قه‌ره‌یلان ده‌ ببینن، كو د سالا 2009 ده‌ ب رێكا ریپۆرتاجه‌كێ د گه‌ل رۆژنامه‌ڤانێ تورك یێ نیاس حه‌سه‌ن جه‌مال كرییه‌، تێده‌ دبێژه‌: «هوون دزانن ژ به‌ر چ سه‌ده‌مێ جه‌ماعه‌تا فه‌تحووللا گوله‌ن د ڤان سێ چوار سالێن دووماهیێ ده‌ گه‌ڵه‌كی ئێریشی مه‌ دكه‌؟ ژ به‌ر كو جه‌ماعه‌ت دخوازه‌ پێگه‌ها خوه‌ د ناڤ سیسته‌ما ده‌وله‌تێ ده‌ ب هێز بكه‌، له‌وما خوه‌ زێده‌ نزیكی حكومه‌تا پارتیا داد‌و گه‌شه‌پێدانی دكه‌. خوه‌ ب هێز دكه‌‌و ژ ئه‌مریكا پشته‌ڤانیێ وه‌ردگره‌. ئه‌مریكا ژی ته‌ڤگه‌را گوله‌ن وه‌ك رێبه‌رێ جیهانا ئیسلامی دده‌ پێش. ته‌ڤگه‌ر دخوازه‌ بۆ ئه‌مریكا ببێژه‌ كو؛ ئه‌م ل دژی PKK نه‌‌و ئه‌م ژی ده‌وله‌تخوازن. ئه‌ڤ راستی به‌لكی بۆ ئه‌ڤ رۆژ مه‌ترسی نه‌به‌، به‌لی پۆ پاشه‌رۆژا توركیا گه‌له‌كی مه‌ترسیداره‌».
قه‌ره‌یلان ل ئاخافتنا خوه‌ زێده‌ دكه‌‌و دبێژه‌: «ژ خوه‌ جه‌ماعه‌ت نه‌شێ PKK ل ناڤببه‌، به‌لێ ئه‌گه‌ر ئه‌م فه‌رزكه‌ن PKK ل ناڤچوو، وێ ده‌مێ دێ چ ب سه‌رێ ناڤچێ بێت؟ دێ ناڤچێن كوردان ببن ناڤه‌ندا پاشڤه‌رووتیێ. ژ خوه‌ ئیران ژی ل مه‌یدانێ یه‌‌و تێ خواستن ته‌ڤگه‌را ئیسلامی وه‌ك ئه‌لته‌رناتیف ل پێشبكه‌ڤه‌». یا راست ئه‌ڤ نه‌رینا PKK یا ده‌رباری جه‌ماعه‌تا گوله‌ن هه‌تا نها ژی نه‌هاتیه‌ گوهه‌رتن.
تشتا كو جه‌ماعه‌تا فه‌تحووللا گوله‌ن پێ باوه‌ر دكه‌ ئه‌وه‌ كو، PKK رێخستنه‌كه‌ تیرورسته‌‌و ئۆجه‌لان سه‌رۆكێ تیرۆرستانه‌‌و ته‌ڤگه‌را كورد‌و PKK ژ هه‌ڤ جوودا نه‌، له‌وما دڤێ PKK لناڤبچه‌‌و قۆناغا چاره‌سه‌ریێ بێ PKK برێڤه‌ بچه‌.

هه‌لوێستی ئه‌ردۆگان یێ دوه و ئه‌ڤرۆژ
ل گۆر شیرۆڤا نڤیسكار حه‌سه‌ن جه‌مال، نه‌رینا به‌رێ یا سه‌رۆك وه‌زیر ره‌جه‌ب ته‌یب ئه‌ردۆغان، جوودا نه‌بوو ژ یا جه‌ماعه‌تێ، به‌لێ د ڤان چه‌ند سالێن دووماهیێ ده‌‌و ب تایبه‌ت پشتی قۆناغا چاره‌سه‌ریێ كو ب نهینی ژ دانوسته‌ندنێن ئۆسلۆ ده‌ستپێكر‌و تا نها، گوهه‌رتنه‌ك به‌رچاڤ د هه‌لوێستێ ئه‌ردۆگان‌و ده‌وروبه‌را وی ده‌ دیار بوو، كو PKK و ئۆجه‌لان وه‌ك دانوسته‌نكار ب فه‌رمی هاتن په‌ژراندن‌و پرۆسا چاره‌سه‌ریێ ل پێشكه‌ت ‌و بوو توخم و سه‌ده‌ما لهه‌ڤكه‌تن و دژبه‌ریا حكومه‌تێ و جه‌ماعه‌تێ.

جهێ ئۆجه‌لان د لیسكا پلانا17 كانوونا یه‌كه‌م ده‌
هه‌لوێستێ عه‌بدوللا ئۆجه‌لان به‌رامبه‌ر شه‌ر و ناكۆكیێن د ناڤبه‌را پارتیا ده‌ستهلاتدار و جه‌ماعه‌تا گۆله‌ن ده‌، گه‌له‌كی رۆن و ئه‌شكه‌رایه‌. ئۆجه‌لان د هه‌ڤدیتنا خوه‌ یا دووماهیی د گه‌ل شانده‌یا په‌رله‌مه‌نته‌رێن پارتیا ئاشتی و دیمۆكراتیك ده‌ د ڤێ ه‌ربارێ ده‌ گۆت: «ئۆپه‌ره‌سێونا 17 كانوونا یه‌كه‌م یا ل دژی گه‌نده‌لیێ ده‌ستپێكر، د بنگه‌ه ده‌، ئارمانجا وێ لناڤبرنا قۆناغا چاره‌سه‌ریێ یه‌. له‌وما ئه‌م به‌نزینێ ل ئاگر ناكن».
هه‌روه‌ها ئۆجه‌لان باوه‌ر دكه‌ كو ئارمانجا ڤێ ئۆپه‌ره‌سیۆنێ لناڤبرنا ره‌جه‌ب ته‌یب ئه‌ردوغانه‌‌و سه‌ده‌ما وێ یا سه‌ره‌كه‌ ژی ژ به‌ر چاره‌سه‌ركرنا دۆزا كورده‌ ب رێكا دیالۆكێ. ئۆجه‌لان هوشیاری دده‌، كو دبه‌ تشتێ ب سه‌رێ سه‌رۆك كومارا میسر یێ هلبژراتی محمد مورسی هات، وه‌ها ب سه‌رێ ئه‌ردۆگان ژی بێ‌و دبه‌ ژ هۆلێ بێ راكرن پێش ده‌ما هلبژارتنان.
مرۆڤ ژ ڤان ئاخافاتنێن ئۆجه‌لان باش تێدگهێ كو، PKK و ئۆجه‌لان‌و ته‌ڤگه‌را كورد ب گشتی، ناخوازن حكومه‌ت و سه‌رۆك وه‌زیر د ئه‌نجاما كۆده‌تایه‌كێ ده‌ لناڤبچن، كو د گه‌ل وان ده‌، قۆناغا چاره‌سه‌ریێ ژی لناڤبچه‌. له‌وما ب هه‌ر ئاوایی پشته‌ڤانیا شه‌ره‌كی ره‌وا و یاسایی دكن به‌رامبه‌ر هه‌می شێوازێن گه‌نده‌لیێ د ناڤ ده‌وله‌تێ ده‌، ب رێكا چه‌سپاندنا بنه‌مایێن دیمۆكراتیك ‌و ب مه‌رجێ به‌ردوامبوونێ د هه‌ولدانێن سه‌رخستنا پرۆسا چاره‌سه‌ریا دیمۆكراتیك و ئاشتیانه‌ بۆ دۆزا كورد.

 

 

Copyright © 2012. all rights reserved . Developed by Avesta Group and powered by Microsoft Azure