هەواڵ

-

شكستە یان؟!! ‌

شیرین. ك‌
5/24/2014 2:46:04 AM 449 ‌جار خوێندراوه‌ته‌وه

لەمانگی مارتی پاردا بۆ یەكەمجار ژنێك توانی ببێتە سەرنووسەری رۆژنامەی لۆمۆند-ی فەرەنسی، كە لە19 دیسەمبەری ساڵی 1944 ەوە دەردەچێت، هۆبیر میری لەسەر داوای ژەنەراڵ دیگۆل دایمەزراندو بووە سەرنووسەری تا ساڵی 1969، لەو ساتەوە تا ساڵی پار هیچ ژنێك نەگەیشتۆتە ئەو پۆستە، بۆیە فەرەنسییەكان دەڵێن: ئەگەر ژنێك توانی ببێتە سەرنووسەری ئەو رۆژنامەیە مانای وایە ژنێكیش دەتوانێت ببێتە سەرۆك و بچێتە كۆشكی ئەلیزێ.
ناتالی نۆگارید كە لەساڵی 1996 ەوە لەلۆمۆند كاردەكات، لەهەڵبژاردنێكی نهێنیدا توانی لەكۆی 11 دەنگ 7 دەنگ بەدەستبهێنێت و ئەو پۆستە وەربگرێت، جگەلەوەی بڕوانامەی باڵای لەزانستە سیاسییەكان و دبلۆمیشی هەیە لەپەیمانگای ئامادەكردنی میدیاكاران لەپاریس، پسپۆڕە لەكاروباری دەوڵەتانی ئەوروپای خۆرهەڵات، پێشتریش لەرۆژنامەی لیبراسیۆن كاریكردووەو پەیامنێری رۆژنامەو رادیۆی بی بی سی بووە لەچیك و قۆقاز، ساڵی 2005 خەڵاتی ئەلبێر لۆندەر- ی وەرگرتووە وەكو میدیاكارێكی سەركەوتوو.
كاتێك نۆگارید بوو بەسەرنووسەر، میدیاكان بەو جۆرە وەسفیانكرد(بەپاكی وئیلتزام بەئیتكی رۆژنامەوانییەوە ناسراوە) بەڵام لەهەمانكاتدا ئاماژەیەكی نیازناپاكانەی پێدرا(كەسێكی كەمئەزموونە لەبواری ئیدارەدا) واتە هەر لەیەكەم ساتی كاركردنییەوە بیرۆكەیەكی وایان بڵاوكردەوە كە دەشێت ئەم ژنە شكست بهێنێت بەتایبەتی: (گەلێك جار هەندێك هێزی باڵای دەرەكی دەست دەخەنە كاروباری رۆژنامەكەوە) كەواتە دەستوەردانی هێزی دەرەكی هۆكارێكی بەهێزە كە ناهێڵێت ئەو ژنە بەو پاكی و ئیلتزامەی هەیەتی و دەخوازێت كاربكات، وەكو لەبەیاننامەی دەستلەكاركێشانەوەكەیدا ئاماژەی پێداوە (هیچ نەماوە نەیكەم بۆ ئەوەی بەڕێكوپێكی و هێمنی ئیشبكەم)، دیارە لەو وڵاتەشدا كە خاوەنی یەكەم شۆڕشی (ئازادی، برایەتی، یەكسانی)یە، ئاساییە ژنێك ببێتە عومدەی پاریس، بەڵام ئاسایی نییە بچێتە یەكێك لەلووتكەكانی دەسەڵاتی چوارەم، چونكە ئێستا لەدنیای پێشكەوتوودا هیچی كەمتر نییە لەلووتكەی دەسەڵاتی سیاسی.

Copyright © 2012. all rights reserved . Developed by Avesta Group and powered by Microsoft Azure